<p style="text-align: justify;">کابل (پژواک، ۲۹ وری ۱۴۰۳): طبیعي پېښو ته د رسېدو په چارو کې د دولت وزارت وایي، د وروستیو ورښتونو او سېلابونو راوتلو له امله په ټول افغانستان کې ۷۰ تنه مړه، ۵۶ نور ټپیان او څه باندې ۲۶۰۰ کورونه په نیمه او بشپړ ډول ویجاړ شوي دي.</p>
<p style="text-align: justify;">طبیعي پېښو ته د رسېدو په چارو کې د دولت وزارت ویاند ملا جانان سایق نن په یوه ویډیویي کلېپ کې ویلي چې افغانستان کې د وروستیو سېلابونو له امله د مرګژوبلې شمېرې لوړې شوې دي.</p>
<p style="text-align: justify;">هغه ویلي، له تېر کوچني اختر وروسته د بارانونو ورېدو او سېلابونو راوتلو له امله په ټول افغانستان کې ۷۰ تنه مړه، ۵۶ نور ټپیان او ۲۶۲۷ کورونه په نیمه او بشپړ ډول ویجاړ شوي دي.</p>
<p style="text-align: justify;">هغه زیاته کړې، د سېلابونو له امله د درېیو جوماتونو، څلور ښوونځیو ویجاړېدو سربېره، ۲۰۱۷ څارویو له منځه تللي او ۹۵ زره او ۸۶۱ جریبه کرنیزه ځمکه هم تخریب شوې ده.</p>
<p style="text-align: justify;">یاد وزارت له خلکو غوښتي چې د بارانونو په راتلونکو څپه کې چې د سېلابونو راوتلو امکان هم په کې ډېر دی، ځانونه خوندي ځایونو ته ورسوي.</p>
