نورالله ځاځی

د بهرنیو چارو وزارت سرپرست کابل کې د ناروې له سفیر سره په لیدنه کې له نړۍوالو سره پر مثبت تعامل ولاړو اړیکو هرکلی کړی او د نړۍ له هېوادونو یې غوښتې چې له افغانانو سره په اقتصادي وده او پراختیايي چارو کې همکاري وکړي.

د افغانستان د بهرنيو چارو وزارت وایي، د اسرائيلو د مشر له لوري د خپلواک فلسطیني دولت له جوړېدو انکار او پر دې ټینګار چې فلسطینیان دې د سعودي عربستان پر قلمرو خپل دولت جوړ کړي، غندي او دا چاره ناشونې او د سعودي د حاکمیت نقض بولي.

د صنعت او سوداګرۍ وزارت وایي، د تېر ۲۰۲۴ میلادي کال په اوږدو کې افغانستان له یو شمېر هېوادونو سره د ۱۲ میلیارده او ۴۲۲ میلیون امریکایي ډالرو په ارزښت سوداګریزه راکړه ورکړه درلوده.

د کډوالو او راستنېدونکو چارو وزارت وايي چې ۴۲ افغانان د پاکستان له زندانونو ازاد او خپل هېواد ته راستانه شول.

د کډوالو چارو کې د ملګروملتونو عالي کمېشنرۍ او د کډوالۍ نړۍوال سازمان د پاکستان له حکومته غوښتي چې له اسلام‌اباد او راولپنډۍ دې افغان کډوال نه و‌باسي.

د ټولګټو وزارت وايي، د تېر زېږدیز کال په اوږدو کې د افغانستان د څلورو بندرونو اوسپنې پټلیو له لارې د ۴،۳ میلیون مټریک ټنه توکو انتقالات شوي دي.

د ټولګټو وزارت وايي، د هرات – کندهار اوسپنیزې کرښې د تفصيلي ډيزاين اړوند پنځه تړونونه د شاوخوا ۲۶۴ میلیون افغانيو په ارزښت له پنځو شرکتونه سره لاسليک شول.

د افغانستان اسلامی امارت د غزې په اړه د امریکا د ولسمشر وروستیو څرګندونو ته په غبرګون کې ویلي چې غزه د فلسطین خاوره ده او بل هېڅوک یې د برخلیک په اړه پرېکړه نشي کولای.

د ملګرو ملتونو د ځانګړي استازي مرستیال د کډوالو چارو وزارت له سرپرست سره په لیدنه کې ویلي چې دوی به له افغان کډوالو سره د پاکو اوبو برابرولو، روغتیا، زده‌کړو او سرپناه برخو کې خپلو مرستو ته دوام ورکړي.

په کابل کې د کار او ټولنیزو چارو وزارت د فني او حرفوي زده‌کړو له مرکزه ۱۵۵ ځوانان فارغ شول.

له پېښو سره د مبارزې د چمتووالي ملي ادارې له یوې خیریه موسسې سره په بدخشان کې له بېوزلو کورنیو سره د مرستې په موخه د څه باندې ۳۸۴ زره امریکایي ډالرو په ارزښت هوکړه‌لیک لاسلیک کړ.

د راپورونو له مخې، د سوډان په سوېل او لوېدیځ کې د پوځ او ملېشه‌وو ترمنځ په تازه نښتو کې ۶۵ کسان وژل شوي او ۱۳۳ نور ټپیان شوي دي.