کابل: سعودي کې د فلسطینیانو دولت جوړول ناشوني او د حاکمیت نقض دی

کابل (پژواک، ۲۲ سلواغه ۱۴۰۳): د افغانستان د بهرنيو چارو وزارت وایي، د اسرائيلو د مشر له لوري د خپلواک فلسطیني دولت له جوړېدو انکار او پر دې ټینګار چې فلسطینیان دې د سعودي عربستان پر قلمرو خپل دولت جوړ کړي، غندي او دا چاره ناشونې او د سعودي د حاکمیت نقض بولي.

دا په داسې حال کې ده چې د غزې د تصرف او له دې سیمې د فلسطنیانو بې‌ځایه کولو په اړه د امریکا د ولسمشر ډونالډ ټرمپ د وړاندیز په اړه د اسرائیل لومړي وزیر بنيامين نتانياهو هم ویلي چې فلسطینیان باید سعودي عربستان ته انتقال شي.

د بهرنیو چارو وزارت خبرپاڼه کې راغلي: «د ا.ا.ا. د بهرنيو چارو وزارت د اسرائيلي اشغالګر رژيم د مشر بنيامين نتنياهو له لوري د خپلواک فلسطیني دولت له جوړېدو انکار او پر دې ټینګار چې فلسطینیان دې د سعودي عربستان پر قلمرو خپل دولت جوړ کړي، پر کلکو ټکو غندي او دا چاره ناشونې او له منل شوو حقیقتونو سره جوت ټکر او د سعودي عربستان د حاکمیت نقض بولي.

خبرپاڼه کاږي، د نتانیاهو دا ډول څرګندونې د نړۍ منل شوو نورمونو ته سپکاوی او د فلسطینیانو له مشروع حقه ښکاره سرغړونه ده.

د خبرپاڼې په حواله، اسلامي امارت ټینګار کوي چې فلسطین د فلسطینیانو خاوره ده او تر هغه چې اشغال دوام کوي او د فلسطیني ولس حقونه نقضېږي، غزه او سیمه به نا ارامه وي چې هغه وضعیت بیا د هيچا په ګټه نه دی.

بل لور ته، د عربي هېوادونو لکه د قطر، مصر، متحده امارات، سعودي عربستان، اردن او فلسطین د بهرنیو چارو وزیرانو په یوه ګډه بیانیه کې ګواښ کړی چې دا ډول اقدام به د سیمې د بې‌ثباتۍ لامل شي او د لا ډېرو جګړو لپاره به زمینه برابره کړي.

سعودي عربستان او قطر هم تېره ورځ د فلسطینیانو د بې‌ځایه کولو په اړه د اسرائیلو د لومړي وزیر بنیامین نتانیاهو څرګندونې غندلې او ویلي یې دي چې فلسطینیان په غزه کې کډوال نه دي چې د اسرائیل په غوښتنه به له دغه ځایه وځي او د هغوی د بې‌ځایه کولو طرحه د نړۍوالو قوانینو ښکاره نقض دی.