کابل (پژواک، ۲۰ سلواغه ۱۴۰۳): د کډوالو او راستنېدونکو چارو وزارت وايي چې ۴۲ افغانان د پاکستان له زندانونو ازاد او خپل هېواد ته راستانه شول.
د کډوالو او راستنېدونکو چارو وزارت نن پرخپله اېکسإپاڼه لیکلي چې یاد شمېر افغانانو کې ښځې او ماشومان هم شامل دي او د روانې سلواغې میاشتې پر ۱۸ مه خپل هېواد ته راستانه شوي دي.
سرچینې د ننګرهار ولایت د تورخم سرحدي آمریت له قوله ویلي، دغه کسان د پاکستان په اسلاماباد ښار کې د قانوني اسنادو نه لرلو له امله نیول شوي وو.
د سرچینې په حواله، یاد افغانان له دوو تر پنځو ورځو پورې د حاجي کمپ په بند کې بندیان وو چې د بشري مرستو له ترلاسه کولو وروسته خپلو اصلي سیمو ته ولېږدول شول.
د یادونې ده، د روانې سلواغې میاشتې په ۱۲ مه هم د پاکستان له زندانونو ۹۱ افغان بندیان ازاد او بېرته خپل هېواد ته راستانه شوي وو.
دا په داسې حال ده چې په دې وروستیو کې په پاکستان کې د افغان کډوالو د نیولو او ځورولو پېښې ډېرې شوې دي.
خو د افغانستان سرپرست حکومت رسمي سرچینو نه دي ویلي چې پاکستان کې څومره نور افغانان بندیان دي.
