نورالله ځاځی

د راپورونو له مخې، د خیبر پښتونخوا په اکوړه خټک کې په حقانیه مدرسه کې نن د جمعې لمانځه پر مهال چاودنه شوې چې له امله یې د مولانا حامدالحق په ګډون لږ تر لږه څلورو کسانو ژوند له لاسه ورکړی او شاوخوا لس نور ټپیان شوي دي.

د کډوالۍ نړۍوال سازمان (IOM) په یوه راپور کې ویلي چې تېر ميلادي کال په افغانستان کې له نیم میلیون ډېر خلک د اقلیمي بدلونونو له امله د رامنځته شوو پېښو په پایله کې بې‌ځایه شوي دي.

د افغانستان او پاکستان د سوداګرۍ او صنایعو ګډې خونې یوه غړي ویلي چې د تورخم دروازې له بندېدو سره پر سوداګریزو توکو بار څه باندې پنځه زره موټر دواړو خواوو ته بند پاتې دي چې له امله یې دوه اړخیزه سوداګري زیانمنه شوې ده.

د راپورونو پر بنسټ، د کانګو هېواد په بوکاوو ښار کې چاودنې چې په یوه غونډه کې شوې، ۱۱ کسان وژلي او ۶۵ نور ټپیان دي.

د یوناما مرستیال د لوړو زده‌کړو وزارت له سرپرست سره په لیدنه کې ویلي چې د افغانستان تحصیلي بنسټونو پیاوړتیا لپاره د لابراتواري توکو او وسایلو برابرولو او بهرني او افغاني استادانو د جذب برخو کې همکاري کوي.

د اقتصاد سرپرست وزیر د اروپا د نړۍوال مشارکت ادارې له رییس سره په لیدنه کې د مالي او بانکي بندیزونو پر لرې کېدو او د پراختیایي پروژو پر پلې کېدو د نړۍوالې ټولنې پر تمرکز ټینګا کړی او دغه کار یې د افغانستان د اقتصادي پرمختګ لپاره حیاتي بللی دی.

د افغانستان کرکټ بورډ وایي، افغان ابدالیان (د افغانستان الف کرکټ لوبډله) د روان کال په اپرېل میاشت کې د سریلانکا او ایرلنډ الف لوبډلو پر وړاندې په درې اړخیزه لوبلړۍ کې ګډون کوي.

د شهیدانو او معلولینو چارو وزارت له یوې مؤسسې سره په پنځو ولایتونو کې کونډو، یتیمانو او معلولینو ته د خوراکي توکو د وېش برخه کې یو هوکړه‌لیک لاسلیک کړ.

د ترکیې د بهرنيو چارو وزارت د جنوبي اسيا څانګې ریيس د افغانستان بهرنیو چارو وزارت له دویم سیاسي مرستیال سره په لیدنه کې ویلي چې هېواد يې غواړي له افغانستان سره په بېلابېلو برخو کې خپلې اړيکې پراخې کړي.

د افغانستان د مالیې وزارت وايي چې د روان لمریز کال په تېره سلواغه میاشت کې د هېواد له دوو ګمرکونو ۱۲۴ ټانکره بې‌کیفیته نفتي توکي مسترد شوي دي.

د افغانستان د مالیې وزارت وايي چې د ګمرکونو لوی ریاست له لوري د ۱۵،۴ میلیون افغانیو په لګښت د خوست په محصولي ګمرک کې د کارکوونکو لپاره لیلیه جوړه شوه.

د ریاست‌الوزراء اقتصادي مرستیال وايي، اسلامي امارت د افغانستان د قومونو تنوع ته د ملي وحدت د سمبولونو په سترګه ګوري او د ملي وحدت پر سالمه ساتنه ټینګار کوي.