<p style="text-align: justify;">جلالاباد (پژواک، ۲۷ کب ۱۴۰۳): د ننګرهار سیمهییز مسوولین وایي چې د دغه ولایت په مرکز جلالاباد ښار کې د څه باندې اته میلیون افغانیو په ارزښت د یوه فرعي سړک د کانکرېټ کولو چارې پیل شوې.</p>
<p style="text-align: justify;">د جلالاباد ښاروالۍ وياند حامد محمودي پژواک خبري اژانس ته وویل چې د دغه ښار د اوومې ناحیې اړوند د ۱۹ م ګذر سیمه کې د ۹۴۵ مترو په اوږدوالي او د پنځو مترو په پلنوالي د یوه فرعي سړک د کانکریټ کولو چارې پیل شوې.</p>
<p style="text-align: justify;">ده وویل چې په دغه پروژه کې د ۹۴۵ مترو په اوږدوالي ویالې هم جوړېږي.</p>
<p style="text-align: justify;">هغه زیاتوي چې دغه پروژه د نړۍوال بانک په مالي لګښټ پلې کېږي چې د درېیو میاشتو په موده کې به یې چارې بشپړې شي.</p>
<p style="text-align: justify;">محمودي وایي، په دغه پروژه کې د سیمې ۱۸۰ اوسېدونکو ته د لنډمهاله کار زمینه هم برابره شوې.</p>
<p style="text-align: justify;">د یادې سېمې یو اوسېدونکي ميرويس وایي، د دغه سړک د خرابوالي له امله ځايي خلک له ډېرو ستونزو سره مخ وو.</p>
<p style="text-align: justify;">هغه وایي، خوښ دی چې نن د دغه سړک د کانکرېټ کولو چارې پيل شوې.</p>
