واشنګټن ( پژواک، ٧ ورى ٩٤ ) : د حکومت اجراييه رييس ډاکټر عبدالله عبدالله وايي، چې که پاکستان له ترهګرۍ څخه د بهرنۍ تګلارې په توګه ګټه وانخلي،نو له افغانستان سره يې اړيکې ښه کېداى شي.
هغه دغه څرګندونې امريکا ته د افغان پلاوي د سفر په وروستۍ ورځ په واشنګټن کې د (هريټيج فاونډېشن) په نامه ديوې ادارې غونډې ته کړې دي.
ډاکټر عبدالله وويل چې په افغانستان او پاکستان کې د نويو حکومتونو تر رامنځته کېدو وروسته په سيمه کې مثبت بدلونونه رامنځته شوي دي.
دى وايي چې د پاکستان په سياست او پوځ کې نوې څېرې راغلي ، اوس ددواړو هېوادونو ترمنځ د اړيکو د ښه کولو لپاره ډېر چانسونه او امکانات شته او دې کار سره په سيمه کې ثبات رامنځته کېـږي.
اجراييه رييس وويل : (( ترهګري ددواړو هېوادونو لپاره ګډه ننګونه ده. ))
خو ډاکټر عبدالله وويل ، چې که پاکستان له ترهګرۍ څخه د بهرنۍ تګلار په توګه له کار اخيستلو لاس واخلي، نو د دواړو هېوادونو اړيکې به نورې هم پياوړې شي.
نوموړي له افغانستان سره د امريکا د مرستو مننه وکړه او ويې ويل چې د امريکا د مرستې او همکارۍ له امله يې هېواد اوس په خپلو پښو ولاړ دى .
عبدالله د ولسمشر بارک اوباما له خوا له افغانستان څخه د سرتېرو په ويستلو کې د ځنډ له امله مننه وکړه او دا يې د افغانانو لپاره مهم اقدام وباله.
نوموړي ډاډ ورکړ، چې په حکومت کې يې د فساد د مخنيوي لپاره پر يوه پلان کار روان دى.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن