<p style="text-align: justify;">لښکرګاه (پژواک ، ۲۳ تله ۱۴۰۳): د هلمند د مرکز لښکرګاه ښار په غازي محمد ایوبخان ښارګوټي کې یوه سوداګر سلګونو یتیمو او بېسرپرستو ماشومانو ته وړیا ښوونځی جوړ کړی چې د لیلیې، ترانسپورټ، خوړو او روغتیایي مرکز اسانتیاوې هم لري.</p>
<p style="text-align: justify;">د هلمند ولایت د مرکز لښکرګاه ښار په غازي محمد ایوبخان ښارګوټي کې د یوه ځايي سوداګر محمدعیسی عمري له لوري یتیمو او بېسرپرسته ماشومانو ته وړیا ښوونځی جوړ شوی چې اوسمهال پهکې ۷۵۰ نجونې او هلکان پر زدهکړو بوخت دي.</p>
<p style="text-align: justify;">یاد سوداګر پژواک خبري اژانس ته وویل، هڅه کوي د دغه ښوونځي د زدهکوونکو شمېر زرو تنو ته ورسوي.</p>
<p style="text-align: justify;">هغه زیاته کړه: «زدهکوونکي مو ټول یتیمان او بېسرپرسته ماشومان دي، هغه یتیمان چې دلته مرکز کې اوسېږي شمېر یې ۵۰۰ تنه دی، سهار زمونږ د ترانسپورټ له خوا راوړل کېږي او ماذیګر یې بېرته کورونو ته وړي او هغه ماشومان چې د ولسوالیو دي د هغوی شمېر ۲۵۰ تنه دی، د هغوی لپاره دلته د لیلیې اسانتیاوې هم برابرې شوې دي او په میاشت کې دوه ورځې خپلو کورونو ته ځي.»</p>
<p style="text-align: justify;">نوموړي دغه راز وویل، په زدهکوونکو کې یې ۱۵۰ تنه یتیمې او بېسرپرسته نجونې هم شاملې دي.</p>
<p style="text-align: justify;">ورته مهال، د یاد ښوونځي مدیر سید محمدالله هاشمي وویل، یاد ښوونځی چې تېر لمریز کال یې په فعالیت پیل کړی او د پوهنې له وزارت سره ثبت دی، په بشپړه توګه د دغه وزارت نصاب پهکې تدریس کېږي.</p>
<p style="text-align: justify;">هغه وویل: «ټول پرسونل مو ۴۰ تنه دي چې ۱۰ تنه یې ښوونکي دي، دوه تنه سر ښوونکي دي او یو یې تدریسي مدیر دی، د نجونو په برخه کې یوه مدیره او شپږ تنه ښوونکې دي. مونږ دلته دینې زدهکړو لپاره ماشومانو ته یوه مدرسه هم لرو چې پنځه تنه ښوونکي لري، همدارنګه زدهکوونکو ته د سهار له خوا د انګلیسي ژبې او عصري زدهکړو زمینه هم برابره شوې ده، د ماسپښین له خوا دیني زدهکړې ورکول کېږي او د ناروغۍ پرمهال یې همدلته په روغتون کې په وړیا ډول درملنه هم کېږي.»</p>
<p style="text-align: justify;">همدارنګه هاشمي زیاته کړي چې د لیلیې لپاره د هستوګنې ټولې اسانتیاوي په پام کې نیول شوي په وینا یې، د خوب ځانګړي ځای، منظم خواړه او د لوبو لپاره بېلابېل ځایونه په پام کې نیول شوي او نجونو لپاره بېلابېل د ښځنیه باتجربه ښوونکو له خوا هم درس ورکول کېږي .</p>
<p style="text-align: justify;">نوموړي وویل، ټولو هغو زدهکوونکو ته چې د دغه ښوونځي په لیلیه کې اوسېږي، لومړنۍ اسانتیاوې برابرې شوې دي او د درې وخته خوړو ترڅنګ د لوبو میدان هم لري.</p>
<p style="text-align: justify;">په همدې حال کې هغه زدهکوونکي چې په دغه ښوونځي کې زدهکړې کوي خوښ دي.</p>
<p style="text-align: justify;">د پنځم ټولګي زدهکوونکی لس کلن شریفالله چې د مارجې ولسوالۍ اوسېدونکی دی، وايي: «پلار نهلرم، ما د دې ارمان درلود چې زدهکړې وکړم، کله چې مې دلته زدهکړې پیل کړې، اوس مې انګلیسي ژبه هم لږ لږ زدهکړې ده او دیني درسونه هم وایم.»</p>
<p style="text-align: justify;">د محمدسلیمان په نوم یو بل نهه کلن ماشوم چې د کندهار د پنجوایي ولسوالۍ اوسېدونکی دی، وایي: «پلار مې شهید شوی دی، اوس دلته زدهکړې کوم، ډېر خوشحاله یم او د شپې له خوا دلته لیلیه کې اوسېږم، خواړه مو هم ښه دي، د خوب ځانګړی ځای لرو او د لوبو لپاره هم هر شی شته.»</p>
<p style="text-align: justify;">ورته مهال، د دغه ولایت د پوهنې ریاست مسوولین د یاد سوداګر له لوري د وړیا ښوونځي جوړول او یتیمو او بېسرپرسته ماشومانو ته د زدهکړو د زمینې برابرول یو ښه ګام بولي او زیاتوي چې نور سوداګر او شتمن افغانان هم باید د پوهنې برخه کې دغه ډول اقدام وکړي.</p>
<p style="text-align: justify;">د یاد ریاست رییس مولوي محمدعوض انصاري وویل: «موږ ترې مننه کوو چې په دغه ولایت کې په دومره لوی تعداد بېسرپرستو او یتیمو ماشومانو لپاره یې د زدهکړو زمینه برابره کړې ده او له نورو ملي سوداګرو مو هم غوښتنه ده چې باید د بېسرپرستو ماشومانو زدهکړو او نورو برخو ته پام وکړي.»</p>
<p style="text-align: justify;">د یادونې ده، د هلمند د ګرشک ولسوالۍ په ترمه سیمه کې هم یو شمېر ځوانانو د خپل کلي شاوخوا ۳۰۰ ماشومانو ته په وړیا ډول د زدهکړو پروسه پیل کړې ده.</p>
