<p style="text-align: justify;">مزارشریف (پژواک، ۲۳ تله ۱۴۰۳): د مزارشریف ښاروالۍ مسوولین وایي چې د دغه ښار د ۱۲ ناحیو د سلګونو ښاریانو په ګډون د مزارشریف ښار پاکولو په موخه عمومي حشر ترسره شو.</p>
<p style="text-align: justify;">دغه حشر چې هممهاله د ښار په ۱۲ ناحیو کې نن سهار پيل او له غرمې وروسته به پای ته ورسېږي، د ښاروالۍ مسوولینو، اصنافو او سلګونه ښاريانو په کې برخه اخیستې وه او موخه يې هم خلکو ته د ښار پاک ساتلو پيغام ورکول وو.</p>
<p style="text-align: justify;">د مزارشریف ښاروالۍ سکټوري رییس احمدجاوید مایار د دغه حشر د پيل پرمهال وويل، د دغه کمپاین موخه ښاریانو ته عامه پوهاوی او پیغام رسونه ده چې د ښار په پاکوالي کې د تنظیف له پرسونل سره همکاري وکړي.</p>
<p style="text-align: justify;">نوموړي زياته کړه، د دغه حشر په پایله کې زرغونې سیمې، پلې لارې او سړکونه د کثافاتو له شتون څخه پاکېږي او هم د ښار پاکوالي برخه کې به ښاریانو ته عامه پوهاوی او پیغام رسونه وشي.</p>
<p style="text-align: justify;">د مزارشریف ښاريان هم د دغه ډول کمپاينونو او حشرونو ترسره کول د عامه پوهاوي او د ښار د پاکوالي لپاره ګټور ګڼي.</p>
<p style="text-align: justify;">د مزارشریف ښار د غالۍپلورونکو صنف وکیل شهابالدین امیري وايي، ښار د ټولو ګډ کور دی، که همداسې ټول ښاريان د ښار پاکوالي کې تل برخه واخلي نو ښار به ښکلی او پاک شي.</p>
<p style="text-align: justify;">دغه راز، د مزارشریف ښار يو بل اوسېدونکی صبغتالله هم وايي، که د ښار پاکوالی له يو اړخه د ښاروالۍ دنده ده نو له بلې خوا د ښار پاک ساتل د عامو خلکو او هټۍوالو دنده هم ده چې ټول بايد خپل مسوولیت ادا کړي.</p>
<p style="text-align: justify;">د یادونې ده چې څو ورځې وړاندې د ننګرهار ولایت د مرکز جلالاباد ښار او اتو ګونو ناحیو د پاکولو عمومي حشر هم ترسره شو.</p>
