ګردېز (پژواک، ١٣ سلواغه ٩٤): د پکتيا ولايت د لجه منګل ولسوالۍ اوسېدونکي وايي چې د پوهنې، روغتيا او رغونې په برخو کې بې شمېره ستونزې لري.
دغه څرګندونې د سلواغې په ١٣مه د لجې منګل ولسوالۍ سلګونو کسانو د يوې لويې غونډې په ترڅ کې وکړې.
د دې ولسوالۍ د اوسېدونکو په استازيتوب ولي خان وويل چې د نورو ولسواليو په څېر په دې ولسوالۍ کې د رغونې چارې نه دي ترسره شوې.
دی وايي چې د دې ولسوالۍ يو سړک هم تر اوسه نه دی رغول شوى او که د رغونې کومې پروژې په کې پیل شوې د اداري فساد له امله نيمګړې پاتې دي.
د هغه د معلوماتو له مخې، له تېرو څو کلونو راهيسې يواځې سلام مخابراتي کمپنۍ په دې ولسوالۍ کې فعاليت لري.
ده وويل چې د مخابراتو په برخه کې هم د لجه منګل ولسوالۍ اوسېدونکي ګڼې ستونزو لري.
د یادې ولسوالۍ قومي مشر ملک تازه مير منګل بيا وايي چې په دې ولسوالۍ کې دوه روغتيايي مرکزونه فعال دي چې يوازې د لومړنیو ناروغيو درملنه په کې کېږي.
دی وايي، د پوهنې برخه کې هم دغه ولسوالۍ ډېره وروسته پاتې ده، د مسلکي ښوونکو شمېر يې کم دى او ډېرى ښوونځي يې ودانې نه لري.
تازه مير منګل وايي، د لجې منګل ولسوالۍ ټول اوسېدونکي له دولت سره همکار دي او په ډېری سيمو کې امنيت دوی په خپله ساتلی دی.
د پکتيا د ولايتي شورا غړي او د دې ولسوالۍ اوسېدونکي تاج محمد منګل وويل چې د دې ولسوالۍ خلک د سړکونو جوړولو ته ډېره اړتيا لري؛ ځکه چې دغه ولسوالي غرنۍ سيمه ده او د سېلابونو د راوتلو له امله خلک تر ډېره وخته بند پاتې کېږي.
ده وويل چې د دې ولسوالۍ ډېری خلک کار نه لري، حکومت بايد د کار زمينه هم ورته برابره کړي.
هغه زياته کړه: ((پخوا د دې ولسوالۍ خلکو د ځنګلونو وهلو له لارې ځان ته يوه ګولۍ ډوډۍ پيدا کوله خو اوس دغه ځنګلونه هم له منځه تللي او دولت بايد بې روزګاره ځوانانو ته د کار زمينه برابره کړي.))
د پکتيا مرستيال والي عبدالولي سهي د يادې ولسوالۍ اوسېدونکو ستونزې مني او وايي چې د حل لپاره به يې اړينې هلې ځلې وکړي.
ده وويل د دې ولسوالۍ د پوهنې برخې ته به ځانګړې پاملرنه کوي او هم يې د روغتيا رياست ته دنده ورکړې چې د دې ولسوالۍ روغتيايي مرکزونو ته امکانات ور زيات کړي .
سهي وويل چې د دې ولسوالۍ د رغونې په پروژو کې د فساد د پيدا کونې په موخه يې پلاوى ټاکلى دى.
لجه منګل د ګردېز او ډنډ پټان ولسواليو تر منځ پرته ولسوالۍ ده او امنيتي ستونزې يې هم کمې دي.
غړيYou need to subscribe to view the full article. Please login or register a new account.
