مزارشريف (پژواک، ۳ لړم ۹۵): د بلخ ولايت د سوداګريزو خونو مسوولين وايي چې د شمال د اقينې بندر له لارې به د لاجوردو پر لاره د رېل کرښې په جوړېدو اقتصادي او سوداګريزې اړيکې پراختيا ومومي.
د دغه ولايت د سوداګريزو خونو رييس ارش يونسي د لړم په ۳مه په بلخ ولايت کې د شمال زون په کچه د لاسي صنايعو د نندارتون د جوړېدو په تړاو خبري ناسته کې وويل چې د شمال د اقينې بندر له لارې به د لاجوردو پر لاره د رېل کرښې په جوړېدو اقتصادي او سوداګريزې اړيکې پراختيا ومومي.
نوموړي چابهار بندر- هرات او حيرتان بندر- چين تر منځ د رېل کرښو جوړېدل د نړيوالو سوداګريزو اړيکو په سمبالښت کې خورا مهمې وګڼلې.
هغه زياته کړه چې په راتلونکي يوه مياشت کې به د شمال د اقينې بندر له لارې له ترکمنستان سره د لارجوردو پر سوداګريز لار د رېل کرښه پرانيستل شي.
ارش وويل چې د دې کرښې په پرانيستو به د شمال له لارې د افغانستان سوداګريز اړيکې له اروپايي هېوادونو سره پياوړې شي.
نوموړي په شمال کې د کرنيزو او صنعتي توليداتو د چارو د پراخېدو په اړه هم خبرې وکړي.
هغه په همدې تړاو په راتلونکې اونۍ په مزارشريف ښار کې د شمال زون د کرنيزو او صنعتي کورنيو توليداتو د نندارتون د جوړېدو يادونه وکړه.
ارش وويل، چې په دغه نندارتون کې به د هېواد په کچه توليد شوي صنعتي او کرنيز توکي نندارې ته وړاندې شي، چې لس سلنه به کې د ښځينه سوداګرو او توليدکارانو وي.
د بلخ ولايت سوداګر محمد رفيق، چې په ياده ننداره کې به کرنيز توکي نندارې ته وړاندې کوي، پژواک ته وويل چې ورته نندارې د دوی سوداګريزو چارو ته پراختيا ورکوي.
نوموړي زياته کړه: ((زموږ تر ټولو ستر مشکل له خپلو توليداتو د عامو خلکو خبرول دي، موږ ضرورت لرو چې عام خلک په کورنيو توليداتو باور وکړي.))
هغه وايي چې په همدې موخه په ياد نندارتون کې برخې اخيستو ته لېوال دی.
د سوداګريزونو خونو رييس ارش يونسي وويل چې له ورته نندارو څخه يې موخه له کورنيو توليداتو سره د خلکو اشنايي، بازارموندنه او توليدکارانو او سوداګرو تر منځ د اړيکو د ټينګښت او قرارداد کولو اسانتيا برابرول دي.
نوموړي زياته کړه چې په دغه نندارتون کې به په ۱۵۰ غرفو کې بېلابېل صنعتي او کرنيز کورني توليدات د درې ورځو لپاره نندارې ته وړاندې شي.
غړي
You need to subscribe to view the full article. Please login or register a new account.
