مزار شريف (پژواک، ١٧ سلواغه ٩٥: د بلخ ولايت د مزار شريف يوې اوسېدونکې مېرمنې له دوو ماشومانو سره ځان له درېيم منزل څخه غورځولى دى.
د بلخ د امنيه قوماندانۍ وياند شېرجان دراني د سلواغې په ١٧مه، پژواک خبري اژانس ته وويل چې دا پېښه تېره شپه د مزار شريف ښار د بلخ ښارګوټي اړونده د مولانا لېسې ترڅنګ رامنځته شوې ده.
هغه زياته کړه چې د يادې سيمې يوې اوسېدونکې ٣٥ کلنې مېرمنې ځان له دوو ماشومانو سره د اپارتمان له درېيم منزل څخه غورځولى، خو مړه شوي نه دي.
د دراني په وينا، دغه مېرمن او ماشومان يې روغتون ته لېږدول شوي او اوس تر درملنې لاندې دي.
د امنيه قوماندانۍ وياند وايي چې پوليسو په دې اړه پلټنې پيل کړې دي.
د مزار شريف د ملکي روغتون سرطبيب ډاکټر نور محمد فيض پژواک اژانس ته وويل چې ياد کسان نن سهار روغتون ته راوړل شوي دي.
هغه د يادې مېرمنې له قوله وويل چې خاوند يې په امريکا کې ژوند کوي، خو تېره شپه يې د ټيلېفوني اړيکو پر مهال ورته ويلي چې بل واده کوي.
د ډاکټر فيض په وينا، يادې مېرمنې د خاوند لخوا د بل واده له پرېکړې وروسته له خپلو ماشومانو سره ځانونه له درېيم منزل څخه لاندې غورځولي دي.
دى وايي چې دوى د يوه موټر د پاسه غورځېدلي او اوس يې روغتيايي حالت د ډاډ وړ دى.
د يادونې ده چې په دې وروستيو کې په بلخ ولايت کې د ښځو پر وړاندې د تاوتريخوالي پېښې زياتې شوې دي.
تېره اوونۍ په دغه ولايت کې يوه خاوند د خپلې مېرمنې دواړه غوږونه پرې کړي وو. دغه راز درې ورځې مخکې ددې ولايت په شولګر ولسوالۍ کې هم يوه ٢٠ کلنه مېرمن د خپل خاوند لخوا وژل شوې وه.
غړيYou need to subscribe to view the full article. Please login or register a new account.
