تالقان (پژواک، ٣٠ زمرى ٩٨): د تخار مدني فعالانو او اوسېدونکو د دغه ولايت حکومتي مسوولينو ته تر سبا پورې وخت ورکړی څو د مخابراتي فعاليتونو ستونزه هواره کړي.
د دغه ولايت مدني فعالان وايي چې له تېرې يوې مياشتې راهيسې د شپې له مخې مخابراتي شبکې کار نه کوي.
د هغوى د معلوماتو له مخې، مخابراتي شبکې د ماښام له شپږو بجو د سهار تر شپږو بجو پورې فعاليت نه کوي چې خلک يې له ګڼو ستونزو سره مخ کړي دي.
په همدې موخه د تخار ولايت اوسېدونکو او مدني فعالانو د زمري په ٣٠مه په مرکز تالقانو کې غونډه جوړه کړې وه.
په غونډه کې مدني فعال شفيق پويا وويل چې د دوى له پرېکړې سره سم حکومتي مسوولين بايد تر سبا پورې د مخابراتي شبکو د فعاليت ستونزه هواره کړي.
هغه وايي: ((موږ تر سبا د مشکل د حل لپاره وخت ورکړى، که چېرې دغه کار ونه کړي، د مخابراتي شبکو او د ولايت د مقام دروازه د اعتراض په توګه تړو.))
همدارنګه په دې غونډه کې د تالقانو اوسېدونکي عرفان بزګر وويل، که چېرې تر سبا پورې دغه ستونزه هواره نه شوه، خلک بيا خپله تصميم نيسي.
ده زياته کړه: ((يو مياشت کېږي له دې مشکل سره مخ يو، دا مشکل بايد نور حل شي.))
يو شمېر نورو کسانو هم ورته څرګندونې وکړې.
په دې اړه د تخار د مخابراتو او معلوماتي تکنالوجۍ رييس غفور تلاش پژواک ته وويل چې دغه ستونزه يې له وزارت سره شريکه کړې څو هر څه ژر يې د حل لپاره اقدام وکړي.
دى وايي: ((له وزارت سره مو خبره کړې، منتظر يو چې څه هدايت راکوي، د مخابراتي شبکو له مسوولينو سره هم نن خبرې کوو.))
بل لور ته د تخار د امنيې قوماندانۍ وياند سمونيار خليل اسير پژواک ته وويل چې په دغه ولايت کې مخابراتي شبکو ته هېڅ ډول امنيتي ګواښ متوجه نه دى، بايد خپل فعاليتونه ٢٤ ساعته کړي.
د يادونې ده، وسله والو طالبانو د تخار، بغلان، کندوز ترڅنګ په ځينو نورو ولايتونو کې هم د شپې له مخې د مخابراتي شبکو فعاليتونه بند کړي دي.
غړيYou need to subscribe to view the full article. Please login or register a new account.
