کابل (پژواک، ٦ ورى ١٤٠٠) : په ترکيه کې د افغانستان سفير امين محمد رامين هيله څرګندوي چې د استانبول ناسته د افغانستان سولې پروسې ته چټکتيا ورکړي.
افغان سفير دغه څرګندونې د ترکيې دولتي اژانس ( انادولو) سره په يوه ځانګړې مرکه کې کړې چې نن د وري په ٦مه، خپره شوې ده.
هغه زياته کړې، ترکيه دا وړتيا لري چې د افغانستان سولې پروسې ته پرمختګ ورکړي او راتلونکې مياشت د استانبول سولې ناستې پر مهال د اوربند لپاره لاره هواره شي.
ټاکل شوې ده، چې د ملګرو ملتونو تر سرپرستۍ لاندې په دغه ناسته کې د طالبانو استازي، د افغان دولت او مطرح سياسيون ګډون وکړي.
رامين وايي، ده لپاره دا ډېر د وياړ ځای دی چې په ترکيه کې دافغان سفير په توګه ټاکل شوى او دلته د خپل هېواد او هېوادوالو خدمت کوي.
ده ويلي: (( ترکان او افغانان نږدې اړيکې لري، دلته هر ترکى وګړى ځان د افغانستان نږدې دوست ګڼي. ))
په سولې پروسه کې د افغان حکومت او ترکيې د رول په اړه سفير وايي چې د افغانستان اسلامي جمهوري دولت له پيل څخه با عزته سولې ته ژمن دى او په دې برخه کې د هر اقدام او نوښت هرکلى کوي.
د هغه په وينا، ولسمشر اشرف غني درې کاله له شرط پرته طالبانو ته د سولې وړانديز وکړ، بيا يې په اختر کې اور بند اعلان کړ او وروسته يې زرګونه د طالبانو بنديان خوشې کړل.
رامين وايي چې افغان دولت د قطر د پروسې هم ملاتړ وکړ، خپل مذاکراتي ټيم يې ولېږه، خو له بده مرغه په دې وروستيو کې هغه پرمختګونه ونه شول.
په انقره کې د افغانستان سفير وايي، ترکيه دا وړتيا لري چې د افغان سولې پروسه ګړندۍ او پرمختګ ورکړي.
ده زياته کړې: (( موږ باوري يو چې د ترکيې له هلو ځلو او مرستې سره په افغانستان کې تاوتريخوالى کم او بيا يوې دوامدارې سولې ته لاره هواره شي. ))
رامين وايي چې د دوحې په مذاکراتو کې پرمختګ ونه شو، او اوس هيله ده چې د استانبول ناستې سره به دې پروسې ته سرعت ورکړل شي.
د هغه په وينا، د افغانستان د حکومت مشرانو له ترکيې غوښتي وو چې د سولې پروسې د پرمختګ لپاره لاس په کار شي.
د افغانستان سفير وايي چې ولسمشر غني هم منلې ده چې د استانبول غونډه کې ګډون کوي، دغه راز د طالب مشرانو د ګډون هيله هم شته، د ملګرو ملتونو، او اروپايي ټولنې استازي هم ګډون کوي.
Visits: 52
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن