د بغلان کوچیان وايي، نامسوولو وسله والو یې لسګونه څاروي وړي دي

پلخمري (پژواک، ١٠ ورى ١٤٠٠): د بغلان کوچيان وايي چې يو شمېر ناپېژاندو وسله والو په تېرو دوو مياشو کې له دوى ١٧٠ څاروي د ټوپک په زور وړي دي.

دغه کوچيان وايي، که حکومت يې ياده ستونزه هواره نه کړي، اړ دي چې مالداري نوره پرېږدي.

د بغلان د مرکز پلخمري اړوند د کرکر سيمې اوسېدونکي يعقوب پژواک ته وويل چې پخوا يې له لېوانو وېره درلوده، خو اوس انسانان راځي او د ټوپک په زور څاروي ترې بيايي.

هغه زياته کړه: ((زه د کرکر غره لمنه کې مالونه پيايم، وړمه ورځ وسله وال راغلل، په زور يې رانه يوه مېږه بوتله، که ور يې نه کړو يا مو وهي او ان د وژلو ګواښ راته کوي.))

دغه راز يو بل شپون احمدالله (مستعار نوم) پژواک ته وويل چې دغه وسله وال کسان په موټرو کې راځي او د زکات په نوم څاروي په زور بيايي.

هغه وايي: ((دلته د غره په لمنه کې د کوچيانو شاوخوا اته زره مېږې دي، له هرې رمې يې څلور يا پنځه مالونه بيولي چې دلته راشي د هغوی په خوښه بايد موږ په خپلو لاسونه مالونه ورته موټر ته پورته کړو، که دا کار ونه کړو سخت وهل کېږو.))

يو شمېر نورو کوچيانو هم ورته څرګندونې وکړې او د يادې ستونزې د حل غوښتنه وکړه.

بل لور ته په بغلان کې د کوچيانو امريت امر بلال احمدزي هم تاييد کړه چې په دغه ولايت کې ناپيژانده وسله وال کوچيان ځوروي او څاروي يې په زور بيايي.

نوموړى وايي، همدغو وسله والو په تېرو دوو مياشتو کې له کرکر، دوشي ولسوالۍ، شش ګزي او مرکزي بغلان ولسواليو د کوچيانو ١٧٠ څاروي بيولي دي.

دى وايي: ((په غالب ګومان چې دغه خلک همدا دولتي زورواکي دي، موږ څو ځلې په دې اړه ولايت مقام ته شکايت کړى، يواځې ژمنې شوې خو ستونزه نه ده حل شوې.))

په دې اړه د بغلان مرستيال والي ذبيح الله احساس پژواک ته وويل چې کوچيانو تر اوسه دغه موضوع په رسمي ډول له ولايت سره نه ده شريکه کړې.

هغه وايي: ((څه موده وړاندې په کرکر سيمه کې د څرځايونو د غصب مخنيوي په موخه ځينې خپلسرې ودانۍ ويجاړې کړې او دغه موضوع به هم له امنيتي ارګانونو سره شريکه کړم، څو هم کوچيان او هم يې څاروي خوندي شي.))

د يادونې ده، تېر کال هم د بغلان خنجان ولسوالۍ کوچيانو د باج اخيستو په غبرګون کې لاريون کړى و او له حکومته يې د يادې ستونزې د حل غوښتنه کړې وه.