سرپل (پژواک، ۱۸ غویی ۱۴۰۱): په سرپل کې یو ځوان د قطره یي اوبو لګولو سیستم د جوړېدو خبره په داسې حال کې کوي چې ځيني بزګران په دغه ولایت کې د اوبو نشتوالي له امله خپل کښتونه له لاسه ورکوي.
د سرپل اوسېدونکی ۳۰ کلن شهاب الدین ارین چې د ټولنیزو علومو له څانګې فارغ شوی، وایي چې په دې وروستیو کلونو کې په دې ولایت کې بزګران له وچکالۍ او د اوبو له کمښت سره مخ دي؛ نو له همدې امله ښه حاصلات نه شي اخیستلای.
هغه زیاته کړه، ده د اوبو د کمښت ستونزې له امله په خپله ځمکه کې د اوبو لګولو قطره یي سیستم جوړ کړی او هڅه کوي چې نور بزګران هم دغه سیستم جوړولو ته وهڅوي.
هغه وویل، د بزګرانو د پام جلبولو او هڅونې په موخه یې د قطره یي سیستم لپاره نیم جریب کچالو کرلی او د قطره یي سیستم له لارې یې اوبه کوي.
نوموړي زیاته کړه: «موږ ټول مسوولیت لرو چې د اوبو له کمښت سره مبارزه وکړو؛ ما په همدې موخه د پنځه دېرش زره افغانیو په لګښت خپله ځمکه کې د اوبو لګولو قطره یي سیستم جوړ کړ.»
هغه وویل : «د یاد سیستم په جوړولو سره مې د زیاتو اوبو د مصرف مخه نیولې او د خپلې ځمکې حاصل مې ډېر کړی؛ له دغه کاره مې موخه دا ده چې بزګرو ته لارښوونه وکړم څو قطره یي سیستم ته مخه کړي او د لږو اوبو په مصرف سره ښه حاصل واخلي.»
د هغه په خبره هغه د نیم جریب ځمکې لپاره ۳۰۰ متره پایپ، یو کوچنی واټر پمپ ۳۰ متره پلاستیک او یو پنځه زره لېتری ټانکر په ۳۰ زره افغانیو اخیستی؛ خو په دغه ځمکه پخوا د اوبو څاه و هل شوې وه.
ارین وویل، له قطره یي سیستم ګټه اخیستل مصرف کموي او حاصل ډېروي؛ هغه له ټولو بزګرانو و غوښتل چې د خپلو ځمکو د اوبو لګولو لپاره دې له دغه سیستمه ګټه واخلي.
په دغه حال کې د سرپل د کرنې رییس قاري عبدالقادر وحدت هم د شهاب الدین ارین د یاد سیستم له جوړېدو هرکلی وکړ، وویل چې وچکالۍ او د اوبو کمښت ته په کتو دا یو ګټور سیستم دی.
د سرپل ولایت د کرنې رییس له ټولو بزګرانو وغوښتل چې د ښه حاصل د تر لاسه کولو په خاطر دې له دغه سیستمه استفاده وکړي.
