له شبرغان ښاره د یوه حشر په ترڅ کې لسګونه ټنه کثافات ټول شول

[restrict paid=”true”]

شبرغان (پژواک، ۱۸ غبرګولی ۱۴۰۱):د چاپېریال‌ساتنې اداره او د شبرغان ښاروالۍ په نوښت له ښاره د کثافاتو ټولولو په موخه په دغه ښار کې عمومي حشر وشو.

د شبرغان ښاروال مولوي حبيب‌الله د دغه حشر د پرانيستې په مراسمو کې چې نن سهار پيل او د غرمې تر ١٢ بجو یې دوام درلود، وویل چې د ښار پاکول يوازې د ښاروالۍ دنده نه، بلکې د ټولنې د ټولو وګړو دنده ده څو د خپل چاپېریاله ساتنه وکړي.

هغه زياته کړه، په دغه عمومي حشر کې  چې نن سهار اته بجې د سيمه ييزو مسوولينو، د دولتي ادارو د ريیسانو، قومي مشرانو، ورزشکارانو او د شبرغان ښار د لسګونو اوسېدونکو په ګډون پيل شو، ١٥٠ ټنه کثافات له ښاره راتول او انتقال شول.

هغه زياته کړه: «موږ هيله من یو چې د شبرغان ښاريان وروسته له نن څخه د ښار پاکوالي ته پاملرنه وکړي او د ښار پر سړکونو کثافات وانه چوي.»

د جوزجان د پوهنې ریيس مولوي محمد طاهر جواد وويل، د چاپېريال ساتنه او د هوا د ککړتيا مخنيوى د خلکو روغتيا تامينوي او د ټولنې هر وګړى بايد تر اخري توانه خپل مسووليت ادا کړي.

هغه وويل چې دغه کاري پروسه باید څه موده وروسته بیا ترسره شي، څو د هېوادوالو ترمنځ دود شي.

د پوهنې د رييس په وينا، د دولت ترڅنګ خلک هم مسووليت لري چې د ښار پاکوالي او صفایۍ ته پاملرنه وکړي او په دې برخه کې د امکان تر بریده کار وکړي.

د جوزجان ولايت مقام د دفتر رییس او سرپرست والي پوهاند محمد مجاهد چې په ياده غونډه کې يې برخه اخيستې وه، وويل، دغه حشر د ښار د پاکوالي او د ښاري فرهنګ دودولو په موخه ترسره شو.

هغه د شبرغان له اوسېدونکو، د ګذر له وکيلانو او د سيمې له مشرانو وغوښتل چې د ښار په پاکولو کې له ښاروالۍ سره همکاري وکړي.

د جمهوري حکومت له سقوط وروسته دا لومړی ځل دی چې د ښاروالۍ او چاپېریال ساتنې ادارې له خوا د شبرغان ښار او څلورګونو ناحیو پاکولولو لپاره عمومي حشر وکړي.

[/restrict]