<p style="text-align: justify;">تالقان (پژواک، ۱۸ زمری ۱۴۰۱): په تخار ولایت کې د شخصي انجیوګانو یو شمېر مسوولان وايي، د موسسو له لوري د پراختیايي پروژو د پلې کېدو لپاره د اسانتیاوو نهشتون له امله، له بېکارۍ سره مخ دي.</p>
<p style="text-align: justify;">هغوی له موسسو او حکومته د ملاتړ غوښتنه کوي او وايي چې د پراختیايي، ښوونیزو او پوهاوي برخو کې د پروژو د پلې کېدو لپاره دې زمینه برابره کړي.</p>
<p style="text-align: justify;">صبور جویا په تخار ولایت کې د دوه بنسټونو مسوول دی او له کلونو راهیسې یې د بهرنیو موسسو په همکارۍ په دغه ولایت کې ګڼې پروژې پلې کړې دي.</p>
<p style="text-align: justify;">خو اوس له یوه کال راهیسې د نړۍوالو موسسو له لوري د پراختیايي، فرهنګي او تعلیمي پروژو د درېدو له امله کومه پروژه نه لري او بېکاره دی.</p>
<p style="text-align: justify;">جویا وویل، امنیتي ستونزې او د پروژو د تطبیق درېدل هغه لاملونه دي چې نوموړی پر دې نه دی توانېدلی چې په تېر یوه کال کې پروژه واخلي او د ډونر ملاتړ دې ترلاسه کړي.</p>
<p style="text-align: justify;">هغه زیاتوي، دا چې سیمهییزې انجیوګانې له سیمې سره پوره بلدتیا لري، نو د نړۍوالو موسسو په پرتله په ډېره ښه توګه پروژې پلې کولای شي؛ خو د ډونر نهشتون هغه اساسی ستونزه ده چې په دغو ورځو کې په تخار کې انجیوګانې ورسره مخ دي.</p>
<p style="text-align: justify;">نوموړی له حکومته غواړي چې د نړۍوالو موسسو له لوري په هېواد کې د پروژو د تطبیق زمینه برابره کړي، څو د بېکارۍ کچه راټيټه شي.</p>
<p style="text-align: justify;">د داخلي انجیوګانو د بېکارۍ او د تطبیق لپاره د پروژو د نهشتون ترڅنګ، په انجیوګانو کې د ښځو نهشتون بله ننګونه ده چې د یاد ولایت ښځې ورسره مخ دي.</p>
<p style="text-align: justify;">نرګس (مستعار نوم) پژواک ته وویل، اووه کاله یې په تخار، بدخشان او کندوز کې له بېلابېلو موسسو سره کار کړی، خو اوس چې د موسسو کار کمرنګه شوی، دا هم بېکاره ده او بله برنامه نه لري.</p>
<p style="text-align: justify;">نرګس زیاتوي، په موسسو کې د کار له لارې یې خپلې اته کسیزې کورنۍ ته ډوډۍ برابروله چې اوس د بېکارۍ او په موسسو کې د ښځو د کار کولو له وېرې له سختو ستونزو سره مخ ده.</p>
<p style="text-align: justify;">هغې دغهراز له حکومته وغوښتل چې د ښځو د کار او فعالیت په اړه جدي پاملرنه وکړي.</p>
<p style="text-align: justify;">په تخار کې د پوهنتون استاد سیدحکیم ابراهیمی وايي، د نظام جوړښت او د خلکو او ان د دولتي ادارو د کارکوونکو د پوهاوي په برخه کې د موسسو رول ډېر اړین دی او د انجیوګانو کاري بهیر باید بېرته پیل شي.
په ورته وخت کې د تخار د اقتصاد رییس فداالرحمن د پراختیايي، تعلیمي او د خلکو د پوهاوي پروژو د تطبیق په برخه کې د نړۍوالو موسسو ترڅنګ د داخلي انجیوګانو رول ارزښتناک بولي.</p>
<p style="text-align: justify;">نوموړی وايي، مخکې د تخار ولایت په کچه په بېلابېلو لکه د اقتصادي او ټولنیزې پراختیا برخو کې ۱۲ نړۍوالو موسسو فعالیت درلود چې له سیاسي بدلون وروسته یې خپلې پروژې ودرولې او دفترونه یې وتړل.</p>
<p style="text-align: justify;">د تخار د اقتصاد رییس په وینا، د ۵۴ داخلي انجیوګانو له ډلې چې د نړۍوالو موسسو ترڅنګ پر کار بوختې وې، اوس یې ۳۹ بېکاره دي او فعالیت نه لري او ۱۵ انجیوګانې یې په ډېرو وړو او کمو پروژو کې فعالیت کوي.</p>
<p style="text-align: justify;">که څه هم د تخار د اقتصاد رییس په داخلي انجیوګانو کې د ښځو د شتون کموالی مني، خو ډاډ ورکوي چې د نړۍوالو موسسو د فعالیت په برخه کې هېڅ ډول امنیتي ستونزه نشته او حکومت د همکارۍ ترڅنګ په هره برخه کې د هغوی له فعالیته هرکلی کوي.</p>
