<p style="text-align: justify;">کابل (پژواک، ۲۰ زمری ۱۴۰۱): د اوبو او انرژۍ سرپرست وزير وايي، په زابل ولایت کې د تورې اوبو بند ډيزاين جوړ شوى او ډېر ژر به يې چارې هم پيل شي.</p>
<p style="text-align: justify;">د اوبو او انرژۍ سرپرست وزير عبدالطیف منصور دغه څرګندونې نن د «خصوصي، ملي او نړۍوالې پانګهونې د جذب او هڅونې کنفرانس» کې وکړې.</p>
<p style="text-align: justify;">هغه وويل چې د زابل د تورې اوبو بند د جوړلو ډيزاين د افغان انجنيرانو له خوا بشپړ شوى او ډېر ژر به يې د جوړېدو چارې هم پيل شي.</p>
<p style="text-align: justify;">نوموړي په دې اړه نور جزئيات وړاندې نه کړل، خو د پژواک د راپور له مخې، دغه بند د کلات ښار په ۴ کیلومترۍ کې په نوخېز سیمه کې پروت دی چې د جوړولو چارې یې د تېر حکومت له خوا د ۱۳۹۹ لمریز کال په وروستیو کې پيل شوې وې او د سیاسي بدلون په راتلو ودرېدې.</p>
<p style="text-align: justify;">د اوسني ډیزاین او پلان له مخې به د دغه بند دېوالونه له ۱۵ مترو څخه ۲۵ مترو ته لوړ شي چې په بشپړېدو به یې دغه بند د ۱۵۰ میلیونه متره مکعبه اوبو د زېرمه کولو وړتیا ولري او زرګونه هکتاره ځمکه به خړوبه کړي.</p>
<p style="text-align: justify;">دغهراز د یاد بند د جوړولو لپاره ۹۲ میلیونه افغانۍ ځانګړې شوې وې خو په نوي ډیزاین کې ۱۴۰ میلیونه افغانیو بودجې ته اړتیا لري.</p>
<p style="text-align: justify;">همدارنګه د اوبو او انرژۍ وزارت سرپرست عبداللطیف منصور وویل چې په هېواد کې له اقتصادي ستونزو سره سره بیا هم د اوبو او انرژۍ په برخه کې د ځینو پروژو کارونه جاري ساتل شوي دي.</p>
<p style="text-align: justify;">هغه زیاته کړه، اوس په افغانستان کې امنیت ښه شوی، د سوداګرو او پانګهوالو لپاره دا ښه فرصت دی څو د اوبو او انرژۍ په برخه کې پانګهونه وکړي.</p>
<p style="text-align: justify;">په همدې حال کې په یاده غونډه کې د کانونو او پټرولیم سرپرست وزیر شهابالدین دلارو وویل چې له ډبرو سکرو څخه یې ۱۷۰۰ میګاواټه برېښنا د تولید طرحه ریاست الوزرا ته پیشنهاد کړې ده.</p>
<p style="text-align: justify;">هغه زیاته کړه، د افغانستان په څېر طبیعي زیرمې په هېڅ هېواد کې نشته نو باید په ښه توګه ورڅخه استفاده وشي.</p>
<p style="text-align: justify;">نوموړي دا هم وویل چې په نږدې راتلونکي کې به ١٨ لوى او کوچني کانونه داوطلبۍ ته وړاندې کړي.</p>
<p style="text-align: justify;">دغهراز په ياده غونډه کې د ریاست الوزرا اقتصادي مرستیال ملا عبدالغني برادر وويل: «موږ ولس ته ډاډ ورکوو چې د کانونو د استخراج، بندونو په جوړولو او نورو برخو کې پانګونه او کارونه ورځ په ورځ زیاتېږي، ښايي په لږ وخت کې افغانستان پر ځان بسیا شي.»</p>
<p style="text-align: justify;">نوموړي ډاډ ورکړ چې د اسلامي امارت ټول مسوولین په هېواد کې د اوسنیو ستونزو د هواري هڅه کوي.</p>
<p style="text-align: justify;">برادر یو ځل بیا له هېواده بهر افغان سوداګرو او پانګهوالو وغوښتل چې د هېواد په بیارغونه او ځانبسیاینه کې همکاري او پانګونه وکړي؛ ځکه په دغه کار سره نه یوازې هېواد او خلکو ته خیر رسېږي، بلکې سوداګرو ته خپله هم ګټه رسوي.</p>
<p style="text-align: justify;">په یاده غونډه کې د سوداګرۍ سرپرست وزیر نورالدین عزیزي وویل، یو شمېر سوداګرو ورسره ژمنه کړې چې د انرژۍ په برخه کې به ۲۰۰ میلیونه ډالره پانګهونه کوي.</p>
<p style="text-align: justify;">هغه له داخلي پانګهوالو او سوداګرو غوښتنه وکړه چې د اوبو او انرژۍ په برخه کې دې پانګونه وکړي، څو افغانستان پر ځان بسیا شي.</p>
<p style="text-align: justify;">دی وایي، حکومت له خصوصي سکتوره ملاتړ کوي او ترې غواړي چې د افغانستان په جوړولو کې دې برخه واخلي.</p>
<p style="text-align: justify;">د يادونې ده، په دې غونډه کې د کانونو او پټرولیم، اوبو او انرژۍ او اقتصاد وزارتونو او د یلو ریور کمپنۍ او ځينو نورو شرکتونو ترمنځ د سروبي دویمې پروژې هوکړهلیکونه لاسلیک شول.</p>
