د میدان وردګو په سیداباد کې له یو شمېر سېلاب‌ځپلو سره مرسته وشوه

میدان‌ښار (پژواک، ۲۲ زمری ۱۴۰۱): د میدان وردګو د سیداباد ولسوالۍ د تنګي درې له سېلاب‌ځپلو سره نغدي او د لومړنیو خوراکي توکو مرسته وشوه.

یادې سیمې ته – چې د وړمې شپې سېلابونو سخته ځپلې – نن له غرمې وروسته والي محمدامین عمري د ځینو ادارو د رییسانو په ملتیا سفر وکړ.

والي عمري له زیانمنو سیمو د لیدنې ترڅنګ له ۱۶ هغو کورنیو سره ۳۰-۳۰ زره افغانۍ نغدي مرسته وکړه چې کورونه یې په بشپړ ډول نړېدلي وو.

دغه راز د پېښو پر وړاندې د چمتووالي او کلیو بیارغونې او پرختیا ریاستونو له سلو سطحي زیانمنو کورنیو سره د شاوخوا لس زره افغانیو په ارزښت د روغتیايي توکو او لومړنیو وسایلو مرسته وکړه.

محمد امین عمري زیانمنو کورنیو ته په نږدې راتلونکي کې د لا ډېرو مرستو رسولو ډاډ ورکړ.

د دواب سیمې اوسېدونکي محمد وارث پژواک خبري اژانس ته وویل، خوښ دی چې په لومړي ځل حکومتي مسوولینو یادې سیمې ته سفر کړی، خو زیاته یې کړه چې یادې مرستې یې اړتیاوې نه شي پوره کولای حکومت باید له دوی سره د کورونو په بیارغولو کې نوره مرسته هم وکړي.

Views: 109