<p style="text-align: justify;">کابل (پژواک، ۸ وږی ۱۴۰۱): مالیې وزارت د تقاعد شوو کارکوونکو د معاشونو د ورکړې لپاره د ۴ میلیارده افغانیو د ځانګړې کولو خبر ورکوي او وایي، په تېر یو کال کې یې له ۱۳۵ میلیارد افغانیو ډېر عواید راټول کړي دي.</p>
<p style="text-align: justify;">د مالیې وزارت سرپرست ملا هدایتالله بدری نن (د سلواغې ۸ مه) په کابل کې «ولس ته د حکومت حساب ورکولو» په غونډه کې وویل، دغه وزارت په تېر یو کال کې د ګمرکونو او عوایدو د عمومي ریاست له لارې څه باندې ۷۰ میلیارده افغانۍ او له ۶۵ میلیارد ډېرې افغانۍ یې د مالیاتي او غيرمالياتي عوايدو له لارې راټولې کړې دي.</p>
<p style="text-align: justify;">هغه وايي، په تېر یو کال کې ځکه د دغه وزارت عواید ډېر شوي چې د ګمرکونو د عوایدو د راټولولو په بهیر کې بشپړ شفافیت راغلی، سوداګرو ته لازمې اسانتیاوې برابرې شوې او پیچلي اداري سیسټم ساده کړل شوی دی.</p>
<p style="text-align: justify;">د هغه په خبره، دغه وزارت ماليه ورکوونکو ته د اسانتياوو برابرولو او د دوی د هڅونې په موخه د اصنافو مالياتي نورم کچه له ۱،۵ سلنې ۰،۵ سلنې ته راټيټه کړې او د هغوى د تېرو کلونو جريمې يې ورته معاف کړې دي.</p>
<p style="text-align: justify;">نوموړی زیاتوي، ملي بودجه د لومړي ځل لپاره له کورنیو عوایدو جوړه شوه؛ لکه څنګه چې د ۱۴۰۰ کال د وروستۍ ربعې لپاره ۵۳ میلیارده افغانۍ او د ۱۴۰۱ کال لپاره د ۲۳۱ میلیارد افغانۍ بودجه ترتیب شوه، پر دې سربیره، هغه زیربنایي پروژې چې د خلکو په ټولنیز او اقتصادي ژوند کې د پام وړ او ښکاره اغېز لري، هم په ملي بودجه کې شامل شوې دي.</p>
<p style="text-align: justify;">هغه زیاته کړه، د جوزجان ولایت د قوشتیپې کانال پروژه چې د هېواد په کچه یو له سترو او مهمو زیربنایي پروژو شمېرل کېږي، په ملي بودجه کې شامله شوې او سږ کال یې د تطبیق لپاره ۷ میلیارده افغانۍ ځانګړې شوې دي.</p>
<p style="text-align: justify;">بدري وايي، د افغانستان د اقتصاد په اړه د نړيوال کنفرانس جوړېدل، له نړيوالې ټولنې سره د اقتصادي اړيکو عادي کول، د افغانستان پر بانکي سکټور د بنديزونو راکمول، د بشري مرستو راجلبول او د لنډمهاله او اوږدمهاله مرستو د ترسره کولو لپاره د ملګرو ملتونو او نړيوالې ټولنې ژمنې، د یاد وزارت له نورو لاسته راوړنو دي.</p>
<p style="text-align: justify;">هغه وویل، د مسلکي کدرونو او وړ کسانو د جذب لپاره، په ۱۴۰۰ کال کې لسګونه کسان د ازادې سیالۍ له لارې د دغه وزارت په مهمو بستونو ګمال شوي او ۱۰۵۸ نور بستونه سیالۍ ته وړاندې کیږي.</p>
<p style="text-align: justify;">نوموړي همدا راز زیاته کړه، په دغه کال کي د معیاري کولو او اصلاحي پروګرامونو له لارې د ۸ دولتي شرکتونو فعالیتونه له بيرته پیل شوي او په پام کې ده چې د بلخ د سیلو، پلخمري د سیلو شرکتونه، افغان د نساجۍ فابریکه، د کندهار د نساجۍ فابریکه، د بغلان د بورې فابریکه او د لاسي صنایعو شرکتونه هم بيرته ژر فعال شي.</p>
<p style="text-align: justify;">په ورته مهال د دغه وزارت ویاند احمدوليحقمل د تقاعد شوو کسانو د حقونو ورکولو په اړه د پوښتنې پّ ځواب کې خبریالانو ته وویل، دغه ستونزه به ډېر ژر هواره شي.</p>
<p style="text-align: justify;">هغه زیاته کړه: «د تقاعد شوو کسانو موضوع نږدې حل شوې، په بودجه کې څلور میلیارده افغانۍ ځانګړې لرو، د متقاعدینو لپاره، ځینې تخنیکي ستونزې وې چې مالیې وزارت د علومو اکاډمۍ سره هغه ستونزې حل کړې، په دې اړه یو پلان هم جوړ شوی او تېره ورځ مو کابینې ته استولی، هیله من یو چې ومنل شي.»</p>
<p style="text-align: justify;">هغه ټینګار کوي او وايي، د متقاعدینو د حقونو او امتیازاتو د ورکړې لپاره پیسې ځانګړې شوې چې تخنیکي ستونزو د حل په صورت کې به د هغوی معاشونه ورکړل شي.</p>
<p style="text-align: justify;">د یو خبریال بله پوښتنه د افغانستان د پورونو په اړه وه.</p>
<p style="text-align: justify;">د مالیې وزارت د خزاینو عمومي رئیس نصرت الله محمود د افغانستان د پورونو په اړه د یوې بلې پوښتنې په ځواب کې وویل: «د اسلامي امارت په وخت کې پور نه دی اخیستل شوی، دا پورونه د جمهوريت له وخته دي چې شاوخوا ۱،۴ میلیارد ډالره کېږي او تر اوسه د هغه ۶،۱ میلیونه ډالر ورکړل شوي او یوه برخه یې په لاره ده چې ډېر ژر به ورکړل شي.»</p>
