کابل (پژواک، ۱۵ تله ۱۴۰۱): د ملګرو ملتونو د بشري مرستو همغږۍ اداره یا اوچا وایي، په افغانستان کې په زرګونه خلک چې وروستیو سېلابونو او زلزلې یې کورونه وران کړي، تر اوسه په خېمو کې ژوند کوي.
یادې ادارې پر خپله ټویټرپاڼه د پورتني مطلب پر څرګندولو سربېره لیکلي، د ژمي په راتلو سره یادې کورنۍ د خپلو کورونو بیارغولو لپاره مرستې ته اړتیا لري او دا ډاډ باید ترلاسه شي چې کورنۍ یې د ژمي په جریان کې سرپناه ولري او تر چت لاندې ژوند وکړي.
بلخوا بیا په تېره زمري میاشت کې د سرپرست حکومت د پېښو پر وړاندې د چمتووالي وزارت مرستیال مولوي شرفالدين د پکتیکا برمل ولسوالۍ ته سفر وکړ او هلته یې د زلزلهځپلو لپاره د ۱۰۰۰ کورونو جوړولو عملي چارې پیل کړې.
همدارنګه دغه کورونه د ملګرو ملتونو د کډوالو نړۍوال سازمان/ UNHCR د ۶ میلیون ډالرو په مالي لګښت جوړېږي او تخنیکي چارې یې د افغانستان لپاره د بشردوستانه او پرمختیایي مرستو موسسې/ AHDAA له خوا پر مخ وړل کېږي.
د یادونې ده، شاوخوا پنځه میاشتې مخکې په پکتیکا او خوست کې مرګونې زلزلې په زرګونه خلک بېکوره کړي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن