هرات ښار (پژواک، ۱۶ لړم ۱۴۰۱): د بند سبزک د ډبرو سکرو کان په هرات ولایت کې یو له هغو شپږو مشهورو کانونو څخه دی چې د کانونو او پټرولیم ریاست د مسوولینو په خبره، سلګونه ځوانان پکې پر کار بوخت دي.
د هرات د کانونو او پټرولیم رییس مولوي فضلاحمد منیب خاموش له پژواک سره په خبرو کې وویل چې د کرخ ولسوالۍ د ډبرو سکرو کان عملاً ګټې اخیستنې ته سپارل شوی او له دغه معدنه د میاشتې څلور زره ټنه د ډبرو سکاره بارېږي.
د هغه په خبره، د هغوی موخه په هېواد کې ځوانانو ته د کار موندل دي؛ نو له همدې امله یې د یاد کان د استخراج زمینه برابره کړې ده.
په دغه حال کې، د هرات ولایت د بند سبزک د ډبرو سکرو کان د بارګیرۍ مسوول رمضان جامي هم له پژواک سره په خبرو کې وایي چې د ورځې ۲۵۰ کسان د دغه کان د استخراج او انکشاف په برخه کې کار کوي.
نوموړي وویل چې په دغه کان کې هر کارګر د ورځني فعالیت او کیندنې له درکه له ۴۰۰ تر ۸۰۰ افغانۍ ترلاسه کوي.
هغه زیاتوي، په هرات کې د خښتو بټیو بندېدو له امله اوسمهال د دغه ولایت ۴۰ سلنه د ډبرو سکاره د کندهار له لارې پاکستان ته صادرېږي او ۶۰ سلنه یې په خپله دغه ولایت کې مصرفېږي.
د ډبرو سکرو کان کې کارګران هم د دغه کاري فرصت له برابرېدو خوښ دي.
محمد چې پنځه کال کېږي د کان کېندنې په برخه کې کار کوي، وایي چې د ورځې په یوازې ځان درې ټنه د ډبرو سکاره استخراجوي او پنځه سوه افغانۍ عاید ترلاسه کوي.
هغه زیاته کړه، دغه اندازه پیسې یې د کورنۍ د لګښت لپاره بسنه نه کوي خو بېکاري د دې لامل شوې چې پر دغو پیسو قناعت وکړي.
نوموړي وویل چې حکومت باید په ټول هېواد کې د کانونو د استخراج لپاره عملي پروګرامونه جوړ کړي، څو ځوانانو ته د کاري زمینې برابرېدو ترڅنګ د هغوی د ناقانونه کډوالېدو مخه هم ونیول شي.
په همدې حال کې، د یاد ولایت یو کانپېژندونکی انجنیر سید عمران – چې پنځلس کاله یې د بند سبزک د ډبرو سکرو کان کې کار کړی- پژواک ته وویل چې د دغه کان د ډبرو سکرو استخراج ډېرو ځوانانو ته د کار زمینه برابره کړې ده.
د عمران په خبره، په ژمي کې په دغه کان کې د ښې هوا له امله د کارګرانو شمېر دوه برابره کېږي.
د کانونو استخراج کارګرانو ته د کاري فرصوتو برابرولو ترڅنګ، د لارۍ موټرچلوونکو ته هم د ښه عاید ترلاسه کولو لامل شوی دی.
د غلام یحیی په نوم یو موټرچلوونکی وایي چې د ورځې له هر ټن بار څخه ۷۰۰ افغانۍ کرایه اخلي.
دغه موټرچلوونکي زیاته کړه، د روځې پنځه ټنه د ډبرو سکاره ښار ته لېږدوي او د دغه کان فعالیت هغه او ټولو باروړونکو موټرچلوونکو ته یوه ښه فرصت دی.
له بلې خوا، د یاد ولایت په بند سبزک کان کې د کانونو او پټرولیم ریاست استازی عبدالحنان رحماني وایي، د ورځې ۱۵ موټره له دغه کان څخه بارېږي او ښار ته لېږدول کېږي.
رحماني زیاته کړه، هر موټر د تګ پرمهال وزن کېږي او پر یو ټن ۱۷۰۰ افغانۍ محصول اخیستل کېږي.
د کانونو او پټرولیم ریاست مسوولینو په خبره، په هرات ولایت کې ۲۸ بېلابېل کانونه موجود دي؛ خو د دغه ولایت پر درېیو کانونو کار روان دی او د نورو کارونه لا پیل شوي نه دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن