د نیمروز د شهیدانو او معلولینو ریاست: د شهیدانو وارثینو او معلولینو د معاش ستونزه به ژر حل شي

زرنج (پژواک، ۱۷ لړم ۱۴۰۱): په نيمروز ولايت کې د شهيدانو یو شمېر وارثین او معلولين له سختو اقتصادي ستونزو شکایت کوي او غواړي چې ملاتړ یې وشي، خو د دغه ولايت مسوولین وايي چې د هغوی دې ستونزې ته به ډېر ژر رسېدنه وشي.

معلولین له امتیازي معاشونو شکایت کوي او د شهیدانو وارثین وايي چې له یوه کال راهیسې یې امتیازي معاشونه نه دي ترلاسه کړي.

نادیه بارکزۍ چې اوسمهال د خپلې شپږکسیزې کورنۍ یوازېنۍ نفقه برابروونکې ده، وايي، مېړه یې په تېر حکومت کې امنیتي کارمند و او ۷ کاله مخکې له مخالفینو سره په مخامخ جګړه کې ووژل شو.

د هغې په وینا، د مېړه له مرګ وروسته یې د «شهید معاش» په نوم د پیسو اخیستو ترڅنګ په کور کې خیاطي هم کوله او خپلو ماشومانو ته یې پرې نفقه برابروله.

خو نوموړې وايي، د تېر کال د زمري په ۲۴مه د مخکني سياسي نظام له ړنګېدو وروسته د “شهيد معاش” په نوم امتیازي پیسې پرې بندې شوې او اوس په ‌ډېرو ستونزو سره د خپلو ماشومانو نفقه برابروي.

هغې زیاته کړه: «دا چې ډېره ستونزمنه شوې او ژوند راباندې سخت شوی، نو له لوږې د ژغورنې په موخه مې خپلې دوه لورڼې چې یوه ۱۶ او بله ۱۴ کلنه وه، واده کړې.»

په ورته وخت کې د شهید یوه بله وارثه ماه‌گل نورزۍ هم ورته شکایت لري او له اقتصادي ستونزو سره لاس او ګرېوان ده.

ماه‌ګل چې زوی یې په تېر نظام کې د ملي پولیسو اړوند د یوه ټانک چلوونکی و، وايي چې د دندې پر مهال د هغه پر ټانک ماین چاودنه وکړه او په کې ووژل شو.

نوموړې په داسې حال کې چې ویل یې له زوی يې دوه ماشومان پاتې دي، نګور یې واده وکړ او ماشومان دې ته ورپرېښودل، زياته يې کړه: «د غني د حکومت پر مهال مې دوه کاله د خپل زوی د شهادت معاش واخیست او په هماغه معاش مې د یتیمانو لګښت ښه پوره کاوه، خو له تېر کال راهیسې چې د شهید معاش نه ورکوي، له ډېرو ستونزو سره مخ شوي یو.»

نوموړې په داسې حال کې چې له سرپرست حکومته د تېر نظام د شهیدانو وارثینو ته د امتیازي معاشونو د ورکړې غوښتنه کوي، زیاته یې کړه: «زه یوه بوډا او کمزورې ښځه یم، د خلکو په کورونو کې کار نه شم کولای، د شهید دغه معاش دې راکړي څو له بېوزلۍ او احتیاجۍ خلاص شو.»

خو معلولین وايي چې امتیازات یې نه یوازې لوړ شوي نه دي، بلکې نور هم ټيټ شوي دي.

په نیمروز ولایت کې یو ملکي معلول صمد رحمتي چې پښه يې ٢٣ کاله مخکې د ماين چاودنې له امله پرې شوې، وايي چې د معيوبيت پر مهال يې د معلولیت امتیازي معاش ترڅنګ د سړک پر غاړه توکي هم پلورل، ورځنۍ چارې یې پر مخ بیوې او د خپلې ۷ کسیزه کورنۍ لګښت یې برابراوه.

خو هغه د اندېښنې په څرګندولو سره وویل، د سياسي نظام له سقوط وروسته د معلولينو امتیازي معاش  له ٥٠٠٠ څخه ٣٠٠٠ افغانيو ته راټيټ شو چې اوس له اقتصادي ستونزو سره مخ شوی دی.

رحمتي زیاتوي: «له مجبوریته مې کراچۍ تر مخ کړه او د نیمروز په کوڅو کې اوبه پلورم، څو  لږ تر لږه کورنۍ مې له لوږې مړه نه شي.»

هغه غوښتنه وکړه چې د معلولينو معاشونه دې بېرته لوړ او پر وخت ورکړل شي.

مسوولین د یادې ستونزې د هواري خبره کوي.

د نيمروز د شهيدانو او معلولينو ریيس قاري عبدالسلام مجذوبي د جزئياتو له ورکولو پرته د شهيدانو او معلولينو کورنيو د شکايت په اړه وويل، د ځینو معاشونه ورکړل شوي او ځینو نورو ته به ورکړل شي.

دى وايي، اوسمهال په دغه رياست کې ٢٠٣٢ معلولین ثبت دي چې ١١٥ یې نظامي، ١٩١٧ يې ملکي او ٤٥٤ يې پیداښتي معلولین دي.

نوموړی زیاتوي، په ۱۴۰۱ لمریز کال کې ۱۴۷۲ نظامي او ملکي معلولین د شهیدانو او معلولینو په امریت کې ثبت شوي چې هره ورځ له ۶۰ تر ۷۰ پورې معلولین ثبتېږي او د معاش مستحق دي.

نوموړي د خپلو خبرو په پای کې یو ځل بیا د شهیدانو د وارثینو  او معلولینو د شکایتونو په اړه د پوښتنې په ځواب کې وویل چې ډېر ژر به د دوی ستونزې ته رسېدنه وشي.