<p style="text-align: justify;">پلعلم (پژواک، ۱۷ لېندۍ ۱۴۰۱): د لوګر د مخابراتو او معلوماتي ټکنالوجۍ ریاست وایي، په یوه تازه ګام کې یې په مرکز پلعلم، محمداغې، برهکيبرک، خروار، څرخ او ازرې ولسوالیو کې د روشن، اېمټي اېن، اتصالات، افغان بېسیم او سلام مخابراتي شبکو ۱۰ سايټونه فعاله کړل.</p>
<p style="text-align: justify;">د دغه ریاست رییس مولوي مطیعالله عابد پژواک خبري اژانس ته وویل: «د لوګر ولایت د خلکو په غوښتنه په مرکز پلعلم کې د سلام مخابراتي شبکې یو سایټ، په محمداغې ولسوالۍ کې د روشن او افغان بېسیم مخابراتي شبکو یو- یو سایټ، په څرخ ولسولۍ کې د سلام، اېم ټي اېن، افغان بېسیم او روشن مخابراتي شبکو یو- یو سایټ، په ازرې ولسوالۍ کې د سلام او اېم ټي اېن مخابراتي شبکو یو- یو سایټ او همدارنګه په برهکی برک ولسوالۍ کې د سلام مخابراتي شبکې یو سایټ فعال شول.»</p>
<p style="text-align: justify;">هغه زیاته کړه، د فعال شوو سایټونو له جملې دوه سايټونه چې پخوا د جګړو له امله ویجاړ شوي وو، بیاترمیم او پرانیستل شول خو پاتې نور یې نوي جوړ او ګټې اخیستنې ته وسپارل شول.</p>
<p style="text-align: justify;">دی وایي، د یادو سایټونو له پرانیستې سره د لوګر هغه سیمې د مخابراتي او انټرنېټي خدمتونو تر پوښښ لاندې راغلې چې په تېرو شلو کلونو کې له دغو خدماتو بې برخې وې.</p>
<p style="text-align: justify;">د مخابراتو رییس وویل چې له دغه ګام سره د دغه ولایت ۹۰ سلنه سیمې د ټیلېفون او انټرنېټ خدمتونو تر پوښښ لاندې راغلې دي او مخابراتي شبکې به ۲۴ ساعتونه خلکو ته مخابراتي او انټرنېټي خدمات وړاندې کوي.</p>
<p style="text-align: justify;">د لوګر د لرو ولسوالیو اوسېدونکي هم خوښ دي چې په سیمو کې یې مخابراتي شبکو فعالیت پيل کړ.</p>
<p style="text-align: justify;">د خروار ولسوالۍ یوه اوسېدونکي حاجي جانمحمد پژواک خبري اژانس ته وویل، ډېرو مخابراتي شبکو د ناامنیو او جګړو له امله د دوی په سیمه کې فعالیت نه کاوه.</p>
<p style="text-align: justify;">هغه زیاته کړه، هغه مهال اړ و مرکز پلعلم ته لاړ شي او له هغه ځایه په کور دننه او بهر له دوستانو سره اړیکې ونیسي.</p>
<p style="text-align: justify;">د څرخ ولسوالۍ یوه اوسېدونکي بسم الله پژواک خبري اژانس ته وویل، مخکې د دوی په لسوالۍ کې هیڅ مخابراتي شبکو فعالیت نه کاوه خو اوس په کې څلورو مخابراتي شبکو ایم ټي این، روشن، افغان بېسیم او سلام فعالیت پیل کړی دی.</p>
<p style="text-align: justify;">هغه زیاته کړه، د ولسوالۍ اوسېدونکي کولای شي چې په اسانۍ په کور دننه او بهر له دوستانو سره اړیکه ټینګه کړي.</p>
<p style="text-align: justify;">د تېر حکومت پر مهال دلوګر ولایت په لرو ولسوالیو ازرې، خروار، څرخ او بره کي برک کې مخابراتي شبکو د ناامنیو او جګړو له امله فعالیت نه شو کولای.</p>
