له حيرتان ګمرک څخه سږ کال نږدې ٨ ميليارد افغانۍ عوايد ترلاسه شوي

<p style="text-align: justify;">مزارشریف (پژواک، ۸ مرغومی ۱۴۰۱): د بلخ ولایت حیرتان ګمرک عواید سږ کال نږدې ٨ مليارد افغانيو ته لوړ شوي چې د تېر کال په پرتله دوه برابره ډېروالى ښيي.</p>

<p style="text-align: justify;">د حیرتان ګمرک ريیس مولوي صفرمحمد سحر پژواک خبري اژانس ته وويل چې د روان کال له پیله تر دې دمه ۷ میلیارد ۸۶۱ میلیون افغانۍ عواید یې ترلاسه کړي دي.</p>

<p style="text-align: justify;">د هغه د معلوماتو له مخې، تېر کال له همدې ګمرک څخه نږدې څلور ميليارده افغانۍ عواید ترلاسه شوي وو.</p>

<p style="text-align: justify;">په همدې حال کې بیا د بلخ ولایت یو شمېر سوداګر په دغه ګمرک کې د توکو د محصول له لوړوالي شکایت کوي.</p>

<p style="text-align: justify;">د بلخ ولایت د یوې تولیدي کمپنۍ مسوول سلیمان ابراهیمي وایي چې دوی خام مواد له بهر څخه واردوي او لوړه ماليه پرې راځي.</p>

<p style="text-align: justify;">هغه د توکو د محصول پرمهال په ګمرکي چارو کې له ځنډه شکايت کوي او وايي چې حکومت بايد ماليه ټيټه او په چارو کې چټکتيا رامنځته کړي.</p>

<p style="text-align: justify;">دغه‌راز، د بلخ يوه سیمه‌ییز سوداګر الله‌شکور قناعت پژواک ته وويل، پانګه‌وال هڅه کوي چې په هر ډول شرايطو کې هېوادوالو ته خدمت وکړي، خو حکومت پانګه‌والو ته اړينه پاملرنه نه کوي.</p>

<p style="text-align: justify;">ده زياته کړه: «ما په خپله کارخانه کې سلګونو کسانو ته د کار زمينه برابره کړې، خو کله چې يو مشکل پيدا کېږي حکومت يې د حل لپاره جدي او سم اقدام نه کوي.»</p>

<p style="text-align: justify;">خو بل لورته، د بلخ ولایت د صنعت او کانونو خونې ريیس امام‌الدین سنایي‌زاده بیا پژواک ته وويل چې په هېواد کې له سیاسي له تحول وروسته د بې‌کيفته توکو پر واردولو بنديز لګول شوى نو ځکه ورسره د توکو ماليه هم لوړه شوې ده.</p>

<p style="text-align: justify;">د بلخ حیرتان بندر ښارګوټی د هېواد او په ځانګړي توګه د شمال یو له مهمو او لویو بندرونو شمېرل کېږي چې له دې لارې افغانستان ته پر منځنۍ اسیا هېوادونو سربېره له چین څخه هم سوداګریز توکي رالېږدول کېږي.</p>