کلات (پژواک، ۱۷ سلواغه ۱۴۰۱): د زابل یو شمېر ځوانان وايي، دوی ته دې په دولتي او نادولتي بنسټونو کې د کار زمينه او په علمي او تحصیلي ډګر کې اسانتیاوې برابرې شي؛ دوی دغهراز د ځوانانو یوه مشورتي بورډ او فرهنګي خونې جوړېدو غوښتنه کوي.
د زابل په مرکز کلات ښار کې نن په همدې اړه غونډه جوړه شوې وه چې پر یو شمېر ځوانانو سربېره، د اطلاعاتو او فرهنګ وزارت د ځوانانو چارو معين هم پکې ګډون کړی و.
د زابل د ځوانانو چارو مدیر نیازمحمد زیارمل وویل، په دغه ولایت سلګونه لوستي او فعال ځوانان شته چې دوامداره ناستې او پروګرامونه لري.
نوموړي د دې ترڅنګ چې د یاد ولایت د ځوانانو غونډو او پروګرامونو لپاره د یوې فرهنګي خونې جوړېدو غوښتنه وکړه، زیاته کړه: «د دغه ولایت لوستو ځوانانو ته په دولتي او نادولتي بنسټونو کې دې د کار زمینه برابره شي، د ځوانانو مشورتي بورډ دې جوړ شي، د دې ولایت تاریخي ابداتو ته دې پاملرنه وشي او هغوی ته دې د زدهکړې زمینه برابره شي او امکانات دې ورکړل شي ترڅو لا ډېر پرمختګ وکړي.»
یوه بل زابلي ځوان محبوب محبت وویل، له ډېرو کلونو راهیسې په تمه و چې له چارواکو سره خپلې ستونزې او غوښتنې مخامخ شریکې کړي او نن ورته دا زمینه برابره شوه .
هغه زياته کړه، دا ډول غونډې د حکومت او ځوانانو ترمنځ واټن له منځه وړي او دوی د نظام ملاتړ ته هڅوي.
نوموړي هم غوښتنه وکړه چې زابلي ځوانانو ته دې د کار زمینه برابره او په علمي او تحصیلي ډګر اسانتیاوې برابرې شي.
د اطلاعاتو او فرهنګ وزارت د ځوانانو چارو معین قاري محمدیونس راشد وویل، د اسلامي امارت مشرتابه ځوانانو ته ځانګړې پاملرنه لري او د هغوی لپاره به ګڼې اسانتیاوې رامنځته کړي.
د هغه په وینا، دوی د اعتماد او اقتصاد په نوم طرحه جوړه کړې چې له مخې به یې، د ځوانانو مسلکي روزنې، د اقتصاد پیاوړتیا، انسجام او نورو برخو کې ورته ځانګړې پاملرنه وشي.
نوموړي زیاته کړه، د چمتو شوې طرحې پر اساس به د هېواد په کچه د ځوانانو د انسجام لپاره ۸۰۰ شوراګانې جوړې شي، ۴۰۰ ځوانانو ته به د رهبرۍ زدهکړې ورکړل شي او د اقتصاد برابرېدو لپاره به یې کارونه وشي.
راشد وايي، ګڼ نور پلانونه هم لري، څو د هېواد په کچه ځوانانو ته فرصتونه برابر کړي او هغوی پرمختګ وکړي.
دا غونډه په داسې حال کې جوړېږي چې وړاندې هم د یاد ولایت ځوانانو د خپلو ستونزو اورولو او حل لپاره بېلابېلې غونډې جوړې کړې دي.
غړيYou need to subscribe to view the full article. Please login or register a new account.
