[restrict paid="true"]
<p style="text-align: justify;">اټلانټا (پژواک، ۴ کب ۱۴۰۱): د اسلامي امارت ویاند ذبیحالله مجاهد وایي، له پاکستاني پلاوي سره د دواړو لورو پر امنيتي اندېښنو، د افغانستان پر فضا د ډرون الوتنو، د مخالفو وسلهوالو پر فعاليت واضح او مفصلې خبرې وشوې.</p>
<p style="text-align: justify;">د پاکستان د دفاع وزیر خواجه محمداصف په مشرۍ د پاکستان یو لوړپوړی پلاوی پرون په یوه ناڅاپي سفر کابل ته راغلی و.</p>
<p style="text-align: justify;">په یاد پلاوي کې د پاکستان استخباراتو ادارې (ایاېسای) مشر جنرال ندیم، د افغانستان لپاره د پاکستان ځانګړی استازي محمدصادق او د پاکستان سفیر نظاماني شامل وو.</p>
<p style="text-align: justify;">د اسلامي امارت ویانذ ذبیحالله مجاهد د شپې ناوخته په ټویټر کې د دغه سفر په اړه په یوه خپره شوې خبرپاڼه کې ویلي چې پاکستاني پلاوي د ریاستالوزراء له اقتصادي مرستیال ملا عبدالغني برادر اخند سره له لیدنې وروسته د دواړو هېوادونو پلاوو ترمنځ مفصلې خبرې وشوې.</p>
<p style="text-align: justify;">هغه زیاته کړې، په افغان پلاوي کې د ملي دفاع وزیر مولوي محمدیعقوب مجاهد، د کورنیو چارو وزیر سراجالدین حقاني، د بهرنیو چارو وزیر امیرخان متقي او د استخباراتو لوی ریاست مشر ملا عبدالحق وثیق شامل وو.</p>
<p style="text-align: justify;">مجاهد ویلي: «په ناسته کې د دواړو لورو پر امنيتي اندېښنو، زموږ پر سيمه د ډرون الوتنو، د مخالفو وسلهوالو پر فعاليت واضح او مفصلې خبرې وشوې.»</p>
<p style="text-align: justify;">د نوموړي په وینا، دغه اراز د دواړو هېوادونو ترمنځ پر ترانزیټ، تجارتي او اقتصادي اړيکو، د کرښې په اوږدو کې د تګ راتګ او پاکستان کې د افغان کډوالو د ستونزو په اړه ګټور بحثونه وشول؛ دواړو لورو وپتېيله چې اقتصادي او سوداګريز مسايل بايد د سياسي ستونزو له امله زيانمن نه شي.</p>
<p style="text-align: justify;">په خبرپاڼه کې راغلي، په پای کې دواړو خواوو د خبرو او تفاهم له لارې د مسایلو پر حل او د سیاسي او اقتصادي روابطو په پراختیا او تقويې ټینګار وکړ.</p>
<p style="text-align: justify;">له دې مخکې د پاکستان بهرنیو چارو وزارت ویلي وو چې کابل ته تللي پلاوي د سرپرست حکومت له مشرانو سره په لیدنو کتنو کې د ترهګرۍ، په ځانګړې توګه د داعش ډلې او پاکستاني طالبانو (ټيټيپي) پر ګواښونو خبرې وشوې.</p>
<p style="text-align: justify;">د سرچینې په وینا، دواړو لورو هوکړه وکړه چې د دغو ګواښونو پر وړاندې به قوي مبارزه کوي او په بېلابېلو برخو کې به خپلې اړیکې پیاوړې کوي.</p>
[/restrict]
