کابل (پژواک، ۱۱ کب ۱۴۰۱): د کابل والي وایي، محتسبین دې د «امر بالمعروف او نهی عنالمنکر» په چارو کې له احساساتو کار نه اخلي، بلکې دا چاره دې په تدریجي توګه ترسره کړي.
د کابل والي مولوي محمدقاسم خالد دغه څرګندونې په کابل کې د امر بالمعروف، نهی عنالمنکر او شکایتونو اورېدو وزارت محتسبینو ته د جوړ شوي سیمینار په وروستۍ ورځ وکړې.
دغه سیمینار، تېره شنبه په کابل کې پیل شوی و او نن پای ته ورسېد چې په کې د کابل د ناحیو او ولسوالیو پر امرینو سربېره د لوګر د ولسوالیو امرینو هم ګډون درلود.
د کابل والي محتسبینو ته وویل: «په اقامه د معروف او ازاله د منکر کې به تدریجي پر مخ ځو او احساساتي حرکت به نه کوو.»
نوموړی وايي، خلکو ته د دین رسول یوه طریقه غواړي او دا هر څه په جذباتو نه شي ترسره کېدلای.
هغه زیاته کړه: «د نظام د ساتنې مسوولیت هم تاسو علماوو ته متوجه دی، خدای دې داسې څه نه کوي چې زموږ او ستاسې د شخصي اعمالو په خاطر دغه نظام له ننګونو او مشکلاتو سره مخ شي.»
نوموړي له محتسبینو غوښتنه وکړه، هغه مسایل چې په دین کې روښانه دي باید بېځایه په کې پېچلتیا رامنځته نه کړئ، څو د خلکو ذهنونونه ګډوډ نه شي.
هغه له امر بالمعروف وزارت څخه غوښتنه وکړه چې هرې سیمې ته دې د هغه ځای په ژبه پوهېدونکي محتسبین ولېږي څو له خلکو سره د هغوی په ژبه خبرې وکړي.
دغهراز په یاده غونډه کې د امر بالمعروف او نهی عنالمنکر وزارت مسلکي مرستیال شیخ فقیر محمد وویل چې خلکو ته باید دعوت په ښو اخلاقو سره وشي.
نوموړِ له محتسبینو غوښتنه وکړه چې له خلکو سره دې په خبرو کې له نرمښت او صبر څخه کار واخلي.
بلخوا، د کابل د ټولو ولسوالیو د امر بالمعروف او نهی عنالمنکر رییس مولوی رحمتالله زبیر پژواک ته وویل، په دغه سیمینار کې د کابل د ۱۴ ولسوالیو امرینو، د ښاري حوزو ۱۰ محتسبینو او د لوګر د اووه ولسوالیو امرینو ګډون درلود.
نوموړی وایي، په دغه سیمینار کې محتسبینو ته په بېلابېلو برخو کې د شپږ ورځو لپاره زدهکړې ورکړل شوې.
GET IN TOUCH
NEWSLETTER
SUGGEST A STORY
PAJHWOK MOBILE APP