<p style="text-align: justify;">کابل (پژواک، ۲۶ لېندۍ ۱۴۰۲): د راپورونو له مخې، د پاکستان حکومت د دغه هېواد په لاهور ښار کې د لومړي ځل لپاره د هوا له ککړتیا سره د مبارزې په موخه مصنوعي باران تجربه کړی دی.</p>
<p style="text-align: justify;">الجزیرې راپور ورکړی چې په لاهور کې د هوا کیفیت، په ځانګړې توګه له تېرو څو اونیو راهیسې خراب دی او د پنجاب ایالتي حکومت د دوو ورځو لپاره د دفترونو او ښوونځیو رخصتولو په ګډون له څو تاکتیکونو کار اخیستی، خو هیڅ یوه نتیجه ور نه کړه.</p>
<p style="text-align: justify;">د پنجاب اعلی وزیر محسن نقوي پرون (شنبه) خبریالانو ته ویلي چې لاهور د ورځې له مخې په دوامدار ډول د نړۍ یو له تر ټولو ککړ ښار بلل شوی، پر همدې اساس د هوا له ډېرې ککړتیا سره د مبارزې په موخه پرون شنبې په کې لومړنی مصنوعي باران و ازمایل شو.</p>
<p style="text-align: justify;">د هغه په وینا، مصنوعي باران د ۱۵ کیلومترۍ په شعاع کې په پام کې نیول شوی و او د لاهور ښار په لږ تر لږ لسو سیمو کې میده میده باران شوی دی.</p>
<p style="text-align: justify;">نوموړي زیاته کړې: «دا ډالۍ د متحده عربي اماراتو له لوري وړاندې شوې ده.»</p>
<p style="text-align: justify;">هغه زیاته کړې، د امارات ټیمونه له دوو الوتکو سره شاوخوا دوولس ورځې مخکې دلته رارسېدلي او د باران تولیدولو له ۴۸ شرارو یې ګټه اخیستې ده.</p>
<p style="text-align: justify;">د یادولو ده، په وروستیو کلونو کې په پاکستان کې هوا ډېره ککړه شوې ده.</p>
<p style="text-align: justify;">پاکستان د اقلیم بدلون برخه کې د نړۍ له لسو زیانمنونکو هېوادونو دی.</p>
