مسافر: فراه ښار کې د شپې تېرولو لپاره هیڅ هوټل او میلمستون نشته

فراه (پژواک، ۱۴ مرغومی ۱۴۰۲): فراه ولایت ته له نورو ولایتونو تللي کسان وايي، په فراه ښار کې د شپې تېرولو لپاره هیڅ هوټل او میلمستون نه دی جوړ شوی.

د بادغیس ولایت یو اوسېدونکي عبدالواحد چې تازه فراه ښار ته راغلی وايي، له یوې کورنۍ مووسسې سره دنده لري، خو کله چې فراه ښار ته په رسمي سفر راځي، د شپې تېرول لپاره ځای پیدا کولو ته حیران وي.

نوموړي وویل: «زه فراه ولایت ته ډېر تګ راتګ لرم، خو په دغه ولایت کې د شپې تېرولو ځای او مسافرخانه نه شته.»

هغه غوښتنه کوي چې فراه ښار کې دې د مسافرو د شپې تېرولو لپاره معیاري میلمستونونه جوړ شي.

ورته وخت کې د غور ولایت اوسېدونکي احمد چي اوسمهال فراه ښار کې ټکسي چلوي وايي، د مناسب ځای نشتون له امله ډېر کله اړ کېږي د ښار سړکونو پر سر په خپل موټر کې شپه تېره کړي.

هغه وايي: «فراه یو لوی او سوداګریز ولایت دی، خو له بده مرغه دلته هیڅ هوټل او مسافرخانه نه شته، د ورځې سلګونه سوداګر او ډریوران شیخ ابونصر فراهي بندر ته تګ راتګ کوي، خو نه په فراه ښار کې مسافرخانه شته او نه هم د لاري په اوږدو کې.»

له دې سره په یاد ولایت کې د سوداګرۍ او پانګونې خونې مسوولین وایي، هڅه یې پیل کړې چې فراه ښار کې د یو معیاري میلمستون جوړ کړي، خو زیاتوي چې لا یې ورته مناسب ځای نه دی پیدا کړی.

د یادې خونې مسوول دین‌محمد نعمتي وایي: «موږ په وار وار له ښاروالۍ سره خبرې کړې او د ځمکي غوښتنه مو کړې، خو تر اوسه موږ ته مناسب ځای ځمکه نه ده راکړل شوې چې د دغه ولایت سوداګر هوټل په‌ کې جوړ کړي.»

د نوموړي په خبره، دغه ولایت کې یې سوداګر هڅولي چې په یاده برخه کې پانګونه وکړي.

بلخوا بیا د فراه د ښاروالۍ مسوولین وايي، د ولایت په کچه یوازې یو میلمستون لري چې یوازې د دولتي کسانو پرمخ خلاص دی، خو په پلان کې لري چې د ښار په یوه مناسبه سیمه کې یو لوی هوټل او میلمستون جوړ کړي.

د فراه ښاروال محمدولي ادریس پژواک ته وویل: «موږ د اوس لپاره یوازي یو میلمستون لرو، خو پلان لرو چې په نږدې راتلونکي کې یوه معیاري مسافرخانه سره د ټولو ملحقاتو جوړه کړو.»

نوموړی وايي، فراه ښار کې یې د میلمستونونو نشتون ستونزې ته پام دی او هڅه به وکړي چې په نږدې راتلونکي کې یې تر یوه حده حل کړي.