<p style="text-align: justify;">مزارشریف (پژواک، ۱۳ کب ۱۴۰۲): د بلخ حکومتي مسوولین وايي چې په تېرو ځو ورځو کې په دغه ولایت کې د واورې ورېدو له امله یو شپون مړ، نږدې یوولسنیم زره څاروي تلف شوي او دوه کورونه نړېدلي دي.</p>
<p style="text-align: justify;">بلخ ولایت مقام د رسنیو او معلوماتو مرکز په یوه خبرپاڼه کې ویلي چې په دغه ولایت کې د تېرو څو ورځو ورښتونو او سړې هوا له امله یو شپون مړ او ۱۱ زره او ۴۱۸ څاروي تلف شوي دي.</p>
<p style="text-align: justify;">خبرپاڼه زیاتوي چې د بلخ شولګرې ولسوالۍ په بایبچه قاق سیمه کې ۱۰ کورنۍ له تلف کېدو ژغورل شوې، په چاهي ولسوالۍ کې دوه کورونه نړېدلي او دهدادي ولسوالۍ کې د یوې فابریکې چت تخریب شوی دی.</p>
<p style="text-align: justify;">په خبرپاڼه کې ویل شوي چې زیانمنو کورنیو ته د ولایت د بېړنۍ کمېټې له لوري د مرستو رسولو او ژوند ژغورنې بهیر پیل شوی دی.</p>
<p style="text-align: justify;">د خبرپاڼه له مخې، په کشندې ولسوالس کې ۸۷۰ څاروي، چهاربولک کې ۳۰۰، چاهي کې ۱۰۰، چمتال کې ۴۴۶۶، شورتېپه کې ۱۴۹، چهارکنت کې ۳۲۱، شولګره کې ۱۰، البرز کې ۱۵۰۰، دهدادي کې ۳۲۱، مارمل کې ۳۳۳۵ او کلدار ولسوالۍ کې ۴۶ څاروي مړه شوي دي.</p>
<p style="text-align: justify;">د یادونې ده، په تېرو څو ورځو کې د پرلهپسې ورښتونو له امله د بلخ ترڅنګ په نورو ولایتونو کې هم خلکو ته مالي او ځاني زیانونه اوښتي دي.</p>
