ننګرهار کې د ترافیکي پېښې له امله دوه کسان مړه او ۱۳ نور ټپيان شوي دي

جلال‌اباد (پژواک، ۱۴ غويی ۱۴۰۳): د ننګرهار امنیه قومانداني وايي چې د جلال‌اباد ښار د نهمې امنیتي حوزې اړوند په غازي امان‌الله خان ښار ګوټی کې د يوې ترافيکي پېښې له امله دوه کسان مړه او ۱۳ نور ټپيان شوي دي.
د ننګرهار ولايت د امنيې قوماندانۍ وياند عبدالبصیر زابلي نن ماښام (د غويي ۱۴مه) پژواک خبري اژانس ته وويل، دغه پېښه نن له غرمې وروسته د جلال‌اباد ښار د نهمې امنيتي حوزې اړوند په غازي امان‌الله ښارګوټي کې د يو مرسيډیز موټر چپه له امله رامنځته ته شوې ده
هغه وویل، د نهمې امنيتي حوزې منسوبين د پېښې ځای ته رسېدلي او ټپيان يي د درملنې په موخه د جلال‌اباد سيمه‌ييز روغتون ته لېږدولي دي.‌
د زابلي په خبره، ياده پېښه د موټر چلوونکي د بې‌غورۍ او ګړندي تګ له امله شوې ده.
د پېښې يوه عيني شاهد رحمان‌الله پژواک ته وويل، په موټر کې د واده د ورا خلک سپاره وو چې په مړو او ټپيانو کې ښځې او ماشومان هم شامل دي.
يوسف ظريفي