<p style="text-align: justify;">پلخمري (پژواک، ۳۰ زمری ۱۴۰۳): د امر بالمعروف، نهیعنالمنکر او د شکایتونو اورېدلو وزارت سرپرست بغلان ولایت کې یوه غونډه کې له مسوولینو غوښتي چې له مشرانو د اطاعت ترڅنګ په خپلو چارو کې له اخلاص، امانتدارۍ او دیانت څخه کار واخلي.</p>
<p style="text-align: justify;">د امربالمعروف، نهی عنالمنکر او د شکایتونو اورېدلو وزارت سرپرست شیخ محمدخالد الحنفی نن بغلان ولایت کې یوه ولسي غونډه کې ګډون او وینا وکړه.</p>
<p style="text-align: justify;">هغه وویل، د اسلامي خلافت له ختمېدو وروسته یوازینی هېواد افغانستان دی چې د نړۍ زبرځواکونه یې د خپلې «پاکې عقيدې» پر مټ مات کړي دي.</p>
<p style="text-align: justify;">ده زیاته کړه، د ننني نظام بدیل او بېلګه په ټوله نړۍ کې نه ليدل کېږي؛ ځکه چې د اسلامي امارت مسوولین پر ولس زړه سواندي دي.</p>
<p style="text-align: justify;">هغه له مسوولینو وغوښتل چې په خپلو چارو کې له اخلاص، امانت او دیانت څخه کار واخلي او د ولس خدمت وکړي.</p>
<p style="text-align: justify;">نوموړي دغهراز وویل، د هر نظام د پایښت لپاره له مشرانو اطاعت اړین دی او ټول مسوولین مکلف دي چې د مشرتابه له لوري پر صادر شوو فرمانونو، لارښوونو او سپارښتنو عمل وکړي او تر نورو یی ورسوي.</p>
<p style="text-align: justify;">حنفي زیاته کړه: «نن هغه نړۍوال پر مونږ له بشري حقونو څخه د سرغړونې تور پورې کوي چې د هغوی په ړندو بمباریو او چاپو کې زرګونه بېګناه افغانانو خپل ژوند له لاسه ورکړ.»</p>
<p style="text-align: justify;">دغهراز، د بغلان والي مولوي عبدالرحمن حقاني یاده غونډه کې وویل، دغه نظام د شریعت تطبیقولو لپاره رامنځته شوی او مسوولین یې پر پلي کولو مکلف دي.</p>
<p style="text-align: justify;">ده وویل، له شته رامنځته شوي فرصت او ډاډمن امنیت څخه ټول هېوادوال برخمن دي او په کارده چې د ثبات د لا ښه ټینګښت لپاره ګډ کار وشي.</p>
<p style="text-align: justify;"></p>
<p style="text-align: justify;"></p>
