د کډوالو چارو وزارت له یوې موسسې سره د همکارۍ هوکړه‌لیک لاسلیک کړ

کابل (پژواک، د وږي لومړۍ نېټه ۱۴۰۳): د افغانستان د کډوالو او راستنېدونکو چارو وزارت د ۲۹۵ زره او ۲۳۲ امریکايي ډالرو په ارزښت له یوې موسسې سره د هوکړه‌لیک له لاسلیکېدو خبر ورکړی دی.

د کډوالو او راستنېدونکو چارو وزارت نن پر اېکس‌پاڼه د یوې خبرپاڼې په خپرولو لیکلي چې یاد هوکړه لیک د «احیای صحت و جامعه افغاني» له موسسې سره په دغه وزارت کې لاسلیک شو.

خبرپاڼه کې راغلي چې یاد هوکړه‌لیک د یاد وزارت د مسلکي معین مولوي عبدالرحمن راشد او د یادې موسسې د استازي له لوري لاسلیک شو چې ارزښت یې ۲۹۵ زره او ۲۳۲ امریکايي ډالر دی.

د سرچینې په وینا، د یاد هوکړه‌لیک پر اساس، یاده موسسه به دغه اندازې پیسې په لغمان ولایت کې ۶۰۰ کورنیو ته د خوراکي توکو د مرستې برخه کې ولګوي.

دا په داسې حال کې ده چې د کډوالو او راستنېدونکو چارو وزارت د روان کال د زمري په ۳۰مه هم د ۴۹ میلیون او ۸۶۹ زره او ۸۳۳ افغانیو په ارزښت دوه هوکړه‌لیکونه له دوو موسسو سره لاسلیک کړي وو.