<p style="text-align: justify;">کابل (پژواک، ۵ وږی ۱۴۰۳): د ملګرو ملتونو د مرستندوی دفتر (یوناما) مشره کندهار ته په خپل سفر کې ویلي، تېر کال د بېلابېلو ادارو پر مټ ۲۶ میلیون افغانانو ته بشري مرستې رسول شوې او په وینا یې، هڅه کوي په راتلونکي کې د افغانستان لپاره بودجه ډېره کړي.</p>
<p style="text-align: justify;">د کندهار د ولایت مقام رسنیز دفتر <a href="https://x.com/Kandahar_Media/status/1827719960170496301">خبرپاڼه</a> کې راغلي چې د دغه ولایت مرستیال والي د افغانستان لپاره د ملګرو ملتونو د مرستندوی دفتر (یوناما) له مشرې روزا اوتونبایوا سره ولیدل.</p>
<p style="text-align: justify;">اوتونبایوا ویلي، در کاله کېږي په افغانستان کې ده، په دې درېیو کلونو کې یې پوره هڅه کړې څو د افغانستان او نړۍ ترمنځ اړیکې ټینګې او پياوړې کړي.</p>
<p style="text-align: justify;">هغې زیاته کړې، کندهار ته یې په دې موخه سفر کړی څو دلته له خلکو سره د کوکنارو د بدیل کښت په اړه له نږدې خبرې وکړي او بیا په راتلونکي کې په یاده برخه کې همکاري وکړي.</p>
<p style="text-align: justify;">د هغې په خبره، د افغانستان له مرکزي بانک سره ګډ کار کوي څو خلکو ته د پور ورکولو برخه کې همکاري وکړي او بیا خلک له یادې لارې کوچني کاروبارونه پيل کړي.</p>
<p style="text-align: justify;">نوموړې وویل، تېر کال یې د ملګرو ملتونو د بېلابېلو ادارو پر مټ ۲۶ میلیون افغانانو ته بشري مرستې رسولې دي او هڅه کوي څو د افغانستان لپاره مالي بودجه په راتلونکي کې ډېره او د بشري مرستو سربېره نورې اړینې پروژې هم تطبیق کړي.</p>
<p style="text-align: justify;">د کندهار مرستیال والي وویل، نړۍوال دې په افغانستان کي د پانګونې لپاره بېلابېل دلیلونه نه بیانوي، هغه اساسي اړتیا چې امنیت دی، اوس بشپړ تأمین دی او تر بل هر وخت په افغانستان کې پانګونې ته زمینه ډېره برابره ده.</p>
<p style="text-align: justify;">مرستیال والي له اوتونبایوا غوښتنه وکړه څو د خلکو لپاره اساسي پروژې تطبیق کړي، د نشهيي توکو د بدیل کښت برخه کي ژر تر ژره عملي ګامونه واخلي او هم پر نشه د روږدو کسانو د درمنلې برخه کې له اړوند ادارو سره بشپړه همکاري وکړي.</p>
