<p style="text-align: justify;">کابل (پژواک، ۲ لړم ۱۴۰۳): د احصایې او معلوماتو ملي اداره د ارقامو په وړاندې کولو سره وايي چې د زمري میاشتې په پرتله په وږي میاشت کې د صادراتو اندازه ډېره شوې خو واردات کم شوي دي.</p>
<p style="text-align: justify;">د احصایې ملي ادارې ویاند محمدحلیم رافع نن (د لړم ۲مه) پر خپله اېکسپاڼه لیکلي چې د روان کال په وږي میاشت کې د افغانستان د صادراتو ټولیز ارزښت ۱۷۳ اعشاریه ۹ میلیون ډالر او د وارداتو ټولیز ارزښت ۹۵۴ اعشاریه یو میلیون ډالر امریکایي و.</p>
<p style="text-align: justify;">سرچینه زیاتوي د روان کال د زمري په میاشت کې د افغانستان د صادراتو ټولیز ارزښت ۱۰۳ اعشاریه ۳ میلیون ډالر او د وارداتو ټولیز ارزښت ۱،۱ میلیارد امریکايي ډالرو ته رسېده.</p>
<p style="text-align: justify;">یاده اداره وايي، د ارقامو تحلیل ښيي چې د روان کال د زمري میاشتې په پرتله په وږي میاشت کې صادرات ۷۰ اعشاریه ۶ میلیون ډالرو ته ډېر شوي خو د وارداتو ټولیز ارزښت ۵۷ میلیون ډالرو ته ټیټ شوی دی.</p>
<p style="text-align: justify;">د سرچینې د معلوماتو له مخې، تر ټولو ډېر صادرات پاکستان، هند او عربي متحده اماراتو ته او تر ټولو ډېر واردات بیا له ایران، پاکستان او چین هېوادونو څخه ترسره شوي دي.</p>
