<p style="text-align: justify;">مزارشریف (پژواک، ۱۰ سلواغه ۱۴۰۳): د بلخ د مرکز مزارشریف ښاروالۍ مسوولین وایي چې له تېرو پنځو ورځو راهیسې یې د دغه ښار له بېلابېلو ناحیو شاوخوا ۷۰۰ موټره کثافات راټول او ځانګړي ځای ته یې انتقال کړي دي.</p>
<p style="text-align: justify;">د مزارشریف ښاروالۍ سکټوري رییس جاوېد مایار وایي چې د مزار ښاروالۍ د رهبرۍ د پرېکړې پر اساس د لومړي ځل لپاره د دغه ښار له ټولو ناحیو د کثافات ټولولو لړۍ پیل شوې چې له مخې به یې له کلونو راهیسې پراته کثافات راټول شي.</p>
<p style="text-align: justify;">د نوموړي په وینا، د کثافات ټولولو لړۍ روانه اونۍ پیل شوې او په ترڅ کې یې د مزارشریف ښار له بېلابېلو ناحیو ۱۲ زره مترمکعب کثافات چې ۷۰۰ موټره کېږي، راټول شوي او دا لړۍ به د ښار تر بشپړ پاکېدو دوام وکړي.</p>
<p style="text-align: justify;">په همدې حال کې، د مزارشریف ښاروالۍ مرستیال محمدنسیم عابد وایي چې د مزارشریف ښاره به په بنسټیزه توګه کثافات راټول او له ښاره به ۱۵ کیلومتره لرې ولېږدول شي.</p>
<p style="text-align: justify;">خو ده له ښاریانو وغوښتل چې په دې برخه کې له ښاروالۍ سره همکار و اوسي او د کثافات له ډېرۍ کېدو دې مخنیوی وکړي.</p>
<p style="text-align: justify;">بلخوا، د مزارشریف ښار اوسېدونکي د ښاروالۍ له دغه اقدامه هرکلی کوي.</p>
<p style="text-align: justify;">د مزارشریف نهمې ناحیې د دشت شور سیمې اوسېدونکی قیس د ښاروالۍ له دغه اقدامه خوښي ښيي او وایي چې د کثافاتو ډېرۍ کېدو خلکو ته ګڼې روغتیایي ستونزې پېښې کړې دي.</p>
<p style="text-align: justify;">د شفیقالرحمن په نوم د مزارشریف ښار نهمې ناحیې یو کلانتر بیا وایي، له هغو سیمو او سړکونو چې کثافات راټولېږي، باید ښاروالۍ پرې جغل واچوي او خلکو ته دې د تګ راتګ لارې پرانیزي څو بېرته د کثافاتو له ډېرۍ کېدو مخنیوی وشي.</p>
<p style="text-align: justify;">د یادونې ده، له دې وړاندې هم مزارشریف ښاروالۍ بېلابېلو ناحیو کې د ښار پاکولو په موخه بېلابېل عمومي حشرونه ترسره کړي وو خو د وخت په تېرېدو په ډېری سیمو کې کثافت ډېرۍ شوي دي.</p>
