خیبر پښتونخوا کې څلور پاکستاني پوځیان وژل شوي

<p style="text-align: justify;">کابل (پژواک، ۱۷ سلواغه ۱۴۰۳): د خیبر پښتونخوا جنوبي وزیرستان کې څلور پاکستاني پوځیان وژل شوي او اووه نور ټپیان دي، دغه راز درې پولیس وسله‌والو له ځان سره بیولي دي.</p>

<p style="text-align: justify;">مشال راډیو نن په یوه راپور کې ویلي، د جنوبي وزیرستان په شکتوی سیمه کې پر یوه امنیتي پوسته د وسله‌والو برید کې څلور پوځیان وژل شوي او اووه  نور ټپیان شوي دي.</p>

<p style="text-align: justify;">سرچینې د سیمه‌ییزو امنیتي چارواکو له قوله لیکلي چې وسله‌والو تېره شپه ۱۱ بجې د (فبرورۍ ۴مه) د شکتوی تحصیل په شرکۍ سیمه کې د پوځ پر امنیتي پوستې برید کړی او وروسته نښته شوې ده.</p>

<p style="text-align: justify;">په راپور کې راغلي، له پېښې وروسته وژل شوي او ټپي سرتېرې په چورلکه کې پوځي روغتون ته لېږدول شوي او امنیتي ځواکونو په سیمه کې د وسله‌والو د لټون په موخه چاڼیز عملیات پیل کړي دي.</p>

<p style="text-align: justify;">بلخوا، نن د جنوبي وزیرستان په سپینې مېنې سیمه کې وسله‌والو درې پولیس له خپلو کورونو ایستلي او له ځان سره یې بیولي دي.</p>

<p style="text-align: justify;">په راپور کې راغلي چې د یادو پېښو مسوولیت تر اوسه چا پر غاړه نه دی اخیستی.</p>

<p style="text-align: justify;">دا په داسې حال کې ده چې د روانې سلواغې میاشتې په ۱۲مه هم د خیبر پښتونخوا په شمالي وزیرستان کې په دوو جلا نښتو کې څلور پاکستاني سرتېري وژل شوي وو.</p>