د بدخشان د کار او ټولنیزو چارو ریاست سږ کال د کار سلګونه جوازونه وېشلي

فیض‌اباد (پژواک، ۴ کب ۱۴۰۳): د بدخشان د کار او ټولنیزو چارو رییس وایي چې د روان کال په اوږدو کې یې ۲۳۶۸ کسانو ته د کار جوازونه ورکړي او سلګونه یتیم او بې‌وزلي ماشومان د زده‌کړو او حرفوي پروګرامونو کې نیول شوي دي.

د بدخشان د کار او ټولنیزو چارو رییس مولوي خیرمحمد صفدر پژواک خبري اژانس ته وویل چې د ورکړل شوو جوازونو له ډلې ۶۴۸ یې بکلوریا سند لرونکو، ۶۶۷ له بکلوریا پورته فارغانو، ۵۲۶ جوازه ليسانس لرونکو، ۱۹۸ خدماتي کارمندانو او ۳۲۹ نور د بېلابېلو موسسو کارمندانو ته ورکړل شوي دي.

هغه وویل چې د یتمیو ماشومانو د ملاتړ او د هغو له سخت کاره د مخنیوي برخه کې ۵۰۹ بې‌وزلي ماشومان او نجونې په نښه شوي چې له ډلې یې ۲۷۱ ماشومان ښوونځیو ته معرفي شوي، ۱۱۳ ماشومان له زده‌کړو وروسته په کوچنیو کارونو بوخت شوي او ۱۲۵ نورو ته د خیاطۍ، د موبایل ترمیم او نورې حرفې ور ښودل کېږي.

صفدر وویل چې ۱۴۰ اړمنو او له ګاونډیو هېوادونو بېرته راستنو شوو کسان ته په مایمي، اشکاشم، شغنان او واخان سرحدي ولسوالیو کې د خیاطۍ، رنګمالۍ او نلدوانۍ برخو کې شپږ میاشتنۍ روزنه ورکړل شوې او د اړتیا وړ وسایل هم پرې وېشل شوي څو وکولای شي ځانونو ته د عاید یوه زمینه برابره کړي.

هغه وویل چې اوسمهال ۴۰ کسان د دغه ریاست د زده‌کړو څلورو پروګرامونو کې د موبایل د ترمیم او کمپیوټر برخو کې پر زده‌کړو بوخت دي.

د بدخشان د کار او ټولنیزو چارو رییس وایي چې په راتلونکي کال کې د درملنه شوو روږدو د ملاتړ په موخه پراخ پروګرامونه تر لاس لاندې لري څو ټولنې ته د دغو کسانو د بېرته ورګرځولو لپاره هغوی پایداره کارونه برابر شي.