نړۍوال بانک په افغانستان کې د خپلو پاتې پورونو د ورکړې لړۍ پیلوي

کابل (پژواک، ۲۹ غویی ۱۴۰۴): د مالیې وزارت وایي، نړۍوال بانک چمتو شوی چې په افغانستان کې د خپلو پاتې پورونو د ورکړې لړۍ پیل کړي او نن به په لومړۍ پړاو کې نږدې ۱۱ میلیون ډالره پور شرکتونو ته ورکړي.

په افغانستان کې د ۱۴۰۰ کال له سیاسي تحول وروسته د ځینو نړۍوالو ادارو بنسټونو خپل فعالیت ودرو، ځینې پروژې یې نیمګړې پاتې او له ځینو شرکتونو پوروړي ولاړل.

د مالیې وزارت په خبرپاڼه کې راغلي چې د دغه وزارت له لوري د نړۍوال بانک له استازو سره د دوامداره اړیکو او خبرو په پایله کي، په لومړي سر کې نړۍوال بانک په کابل کي خپل دفتر پرانیست؛ اوس دغه بانک په بشپړه توګه دې ته چمتو شوي چي په افغانستان کې د خپلو پاتي پورونو د ورکړي عملي لړۍ پیل کړي.

یاد وزارت لیکلي، نړۍوال بانک په افغانستان کې له لوجیستیکي او رغنیزو شرکتونو څخه د تثبیت شوو ارقامو له مخي ۵۰ میلیون ډالره پوروړی دی چي دا تثبیت شوی پور به په څلورو پړاوونو کې له مالیې وزارت سره په همغږۍ اړوندو شرکتونو ته ورکول کېږي.

خبرپاڼه کې راغلي، نړۍوال بانک به په لومړي پړاو کې، چي نن پیلېږي ۱۰،۸‎ میلیونه ډالر په مستقیم ډول شرکتونو ته ورکړي او پاتي ۳۹،۱۱ میلیونه ډالر به په درېیو پړاوونو کې د ماليې وزارت له لاري ورکړي.

خبرپاڼه زیاتوي، مالیې وزارت د نړۍوال بانک له لوري د پورونو د ورکړې پروسې پیلېدل یو ستر مالي پرمختګ بولي چي له دې سره به پراختیایي پروژې له سره پیل شي، خلکو ته به کاري فرصتونه رامنځته شي او د ملي اقتصاد د لا پیاوړتیا په برخه کې به مثبتې پایلې ولري.