<p style="text-align: justify;">کابل (پژواک، ۵ غبرګولی ۱۴۰۴): د راپورونو له مخې، د امریکا ولسمشر ډونالډ ټرمپ د اروپايي ټولنې پر وارداتو د ۵۰ سلنه تعرفې لګولو پرېکړه د راتلونکې جولای میاشتې تر نهمې نېټې پورې ځنډولې ده.</p>
<p style="text-align: justify;">ټرمپ د غبرګولي په ۳مه نېټه اعلان کړی و چې غواړي د اروپايي ټولنې له ټولو وارداتي توکو څخه ۵۰ سلنه ګمرکي تعرفه واخلي، او دا پرېکړه به د جون میاشتې له لومړۍ نېټې نافذه شي.</p>
<p style="text-align: justify;">د ټرمپ له څرګندونو وروسته د اروپايي اتحادیې د سوداګرۍ برخې کمېشنر ویلي وو، د ۲۷ غړو بلاک ژمن دی چې له امریکا سره د «درناوي» پر بنسټ یو سوداګریز تړون ته ورسېږي، نه د «ګواښونو» پر بنسټ.</p>
<p style="text-align: justify;">رویټرز نن په یوه <a href="https://www.reuters.com/business/trump-extends-deadline-reach-eu-trade-deal-until-july-9-2025-05-25/">راپور</a> کې ویلي، د متحده ایالاتو ولسمشر ډونالډ ټرمپ پرون د یکشنبې په ورځ د اروپایي اتحادیې پر وارداتو باندې د ۵۰ سلنه تعرفې د لګولو له ګواښ څخه لاس واخیست او د روان کال د جولای تر نهمې نېټې پورې یې د تعرفې لګول وځنډول.</p>
<p style="text-align: justify;">سرچینې ویلي، د اروپایي کمېسیون مشرې اورسلا ون درلاین پرون له ټرمپ سره ټیلفوني خبرې کړي او له هغه یې غوښتي چې د تعرفو لګول وځنډوي او هغه یې غوښتنه منلې ده.</p>
<p style="text-align: justify;">هغې زیاته کړې، اروپایي ټولنه یوې هوکړې ته د رسېدو لپاره لا ډېر وخت ته اړتیا لري.</p>
<p style="text-align: justify;">د امریکا د حکومت د معلوماتو له مخې، تېر کال امریکا اروپايي ټولنې ته ۳۷۰،۲ میلیارده ډالر صادرات درلودل خو له دې ټولنې يې بیا ۶۰۵،۸ میلیارده ډالر واردات کړي وو.</p>
