کابل (پژواک) – امریکايي چارواکي وايي چې د دغه هېواد د لاسانجلس ښار په نورث هالیوډ سیمه کې یوه ډله پلي کسان پر موټر وهل شوي چې له امله یې لږ تر لږه درې کسان مړه او درې نور سخت ټپیان شوي دي.
د رویټرز د راپور له مخې، پېښه پرون ماښام د لاسانجلس ښار په نورث هالیوډ سیمه کې، د ځايي وخت له شپږو بجو لږ مخکې شوې ده.
د لاسانجلس د پولیسو او اوروژنې ادارې د معلوماتو له مخې، درې پلي کسان د پېښې په ځای کې مړه شوي او دوه نور له موټرچلوونکي سره یوځای په نازک روغتیايي حالت کې نږدې روغتونونو ته لېږدول شوي دي.
پولیسو ویلي چې تر اوسه د پېښې کره لامل نه دی روښانه شوی او څېړنې روانې دي، څو معلومه کړي چې دغه پېښه تصادفي وه او که قصدي.
امریکايي چارواکو تر اوسه د قربانیانو د هویت او د پېښې د لامل په اړه نور جزئیات نه دي خپاره کړي.
