د بادغيس امنيتي مسوولين وايي، د دغه ولایت په تګاب‌عالم ولسوالۍ کې یو کس د ناپېژاندو وسله‌والو له لوري وژل شوی دی.

د بهرنیو چارو وزارت سرپرست پر دې سربېره چې له نړیوالو غوښتي چې پر افغانستان بنديزونه لرې کړي وايي، افغانستان د ټولو افغانانو دی او هغوی په خپل وطن کې د ژوند، سوداګرۍ او کاروبار حق لري.

سختې او خامه لارې، د مخابراتي شبکو نه فعالیت او ډېر کم روغتیایي امکانات هغه ستونزې دي چې د بدخشان د شهر بزرګ ولسوالۍ اوسېدونکي ترې شکایت کوي او له حکومته غواړي چې یادې ستونزې یې ور حل کړي.

په کراچۍ کې افغان قونسلګرۍ وايي، د سیند صوبې له محبسونو څخه د اتو ماشومانو په ګډون ۶۶ افغان بنديان خوشې او هېواد ته ولېږدول شول.

د لوړو زده کړو وزارت وايي، د هېواد په بېلابېلو تحصيلي بنسټونو کې د لیسانس په کچه لس پوهنځي، د ماسترۍ ۱۳ او د دکتورا ۲ پروګرامونه نوي ایجاد شوي دي.

د غزني امنيتي مسوولين وايي چې د دغه ولایت په واغظ ولسوالۍ کې د تندر لوېدو له امله يوه نجلۍ مړه شوې ده.

د بلخ امنیتي مسوولین وایي، د دغه ولایت د مرکز مزارشریف ښار پنځمې امنیتي حوزې اړوند سیمه کې یې د وسله‌والو غلاوو په تور څلور کسیزه ډله نیولې ده.

په اروزګان او زابل ولایتونو کې له ۳۷۶۵ بېوزلو کورنيو سره د خوراکي توکو، لوګر کې له شاوخوا ۱۰۰۰ کورنیو سره د نغدو پيسو او لغمان کې د بزګرانو له ۶ اتحادیو سره د تخنیکي وسایلو مرسته وشوه.

د کندهار د سوداګرۍ او پانګونې خونې مشر د ایران له خوا افغان سوداګرو ته د اوږمهاله ویزو پر ورکړې، د سوداګریزو اړیکو پر پیاوړتیا، د تخصصي نندارتونونو پر جوړولو او د پانګونې پر پراختیا ټینګار وکړ.

د ملي دفاع وزارت وايي، په کابل کې د دغه وزارت او ایراني پلاوو ترمنځ خبرې چې د دواړو ګاونډیو هېوادونو ترمنځ د پولې په اوږدو کې د همکارۍ د پیاوړتیا په هدف وې، پای ته ورسېدې.

د پروان امنيتي مسوولین وايي، په دغه ولايت کې یو کس د خپل تره زوی له خوا وژل شوی او هم يوه اندازه چاودېدونکي توکي ترلاسه شوي دي.

په سرپل کې یو شمېر د چرګانو فارم‌لرونکي د اندېښنې په څرګندولو سره وايي، له بهره د چرګانو واردات او د چرګانو خوراکي توکو د بیو لوړېدل د دې لامل شوی څو په دغه ولایت کې ځيني فارم‌لرونکي خپل فعالیتونه ودروي.