احمد صهیب حسرت

بلوچستان کې ناپېژانده وسله‌والو د ډبرو سکرو پر یوه کان برید کړی چې له امله یې د درېیو افغانانو په ګډون، شل کسان په ډزو وژل شوي او اووه تنه نور ټپیان دي.

د پي‌ټي‌اېم مشر د خیبر پښتونخوا له اعلی وزیر علي‌امین ګنډاپور سره تر لیدنې وروسته ویلي، د پښتنو جرګه به پر خپل وخت په امن ترسره کېږي او ګنډاپور ویلي، جرګه چې هره پرېکړه وکړي،‌ دی به یې د اعلی وزیر په توګه ملاتړ کوي.

د ترکیې د یوه هوایي شرکت الوتکې پیلوټ د پرواز پر مهال مړ شوی او الوتکې بېړنۍ ناستې کړې ده.

د افغاني سرې میاشتې ټولنې رییس په افغانستان کې د برتانیې هېواد د سره صلیب له مسوول سره په ليدنه کې له هغه غوښتي چې د افغاني سرې میاشتې د مرکزي روغتون د تجهیز په برخه کې مرسته وکړي.

د پي‌ټي‌اېم ځینې غړي وایي، د پاکستان پولیسو خیبر کې د اکټوبر ۱۱مې جرګې ته پر راټولو شوو کسانو ډزې کړي، درې کسان یې وژلي او ۱۵ نور یې ټپیان کړي دي.

د مس عینک قراردادي کمپنۍ مشر د ریاست‌الوزراء له سیاسي مرستیال سره په ليدنه کې ویلي، د مس عینک په لومړۍ برخه کې به له ۵ میلیارد امریکایي ډالرو ډېره پانګونه وکړي او په دغه پروژه کې به شاوخوا درې زرو کسانو ته د کار زمینه برابره شي.

د افغانستان د کډوالو او بېرته راستنېدونکو چارو وزارت وايي چې ۲۸ افغانان د پاکستان له زندانونو خوشي شوي دي.

د راپورونو له مخې، بریتانیا ته د تلونکو افغانانو او یو شمېر نورو کډوالو د دوو کښتیو ډوبېدو پېښه کې څلورو کسانو ژوند له لاسه ورکړی، خو معلومه نه ده چې د کومو هېوادونو اوسېدونکي دي.

د صنعت او سوداګرۍ وزارت وایي، د دغه وزارت یوه پلاوي له خصوصي سکټوره د ملاتړ او د باریکاب صنعتي پارک د زیربنایي او برېښنا د کمښت ستونزو د حل په موخه پروان ولایت ته سفر کړی دی.

د راپورونو له مخې، د پاکستان په کراچۍ ښار کې د چیني انجینرانو پر یوه کاروان چاودنه شوې چې له امله یې دوه چینایان وژل شوي، یو چیني او شاوخوا لس پاکستانیان ټپیان شوي دي.

د افغانستان بهرنیو چارو وزارت وایي، پاکستان کې د حکومت او سیاسي مخالفينو د پلويانو ترمنځ ترينګلتیا د اندېښنې وړ کچې ته رسیدلې چې دوام يې پر ټوله سيمه منفي اغېز لرلای شي.

د عدالیې وزارت وایي، د اسلامي امارت مشرتابه د فرمان له مخې، د وزارتونو او امارتي ادارو د تدارکاتو او نورو قراردادونو د روڼتیا په موخه دولتي چارواکي او مامورین نه شي کولای د قراردادونو په داوطلبیو کې ګډون وکړي.