محمد اصف احمدزى

نن د پلازمېنې کابل په ګډون په ټولو ولایتونو کې د کوچني اختر لمونځ د امن په فضا کې ادا شو.

د کابل امنيتي مسوولین وايي چې د درېيمې امنيتي حوزې اړوند سيمه کې پر کاسټر ډوله موټر چاودنه کې يوه ښځه وژل شوې او درې تنه نور ټپيان دي.

په هېواد کې د نوي نظام له ټينګښت وروسته په لومړي ځل د مصالحې عالي شورا مخکیني مشر ډاکټر عبدالله عبدالله له هېواده بهر سفر وکړ.

په کابل کې د روسیې سفارت وايي چې سږکال د کابل- مسکو ترمنځ لومړنی مستقيم پرواز ترسره شو.

د بهرنيو چارو سرپرست وزیر له ايراني سفیر سره په کتنه کې په ایران کې له افغان کډوالو سره د شوي چلند په اړه اندېښنه څرګنده کړې او ويلي دي چې په دې هېواد کې له افغان مهاجرینو سره ناسم چلند د دواړو هېوادونو په اړیکو او عام ذهنیت منفي اغېز کوي.

د کورنيو چارو سرپرست وزير وايي، نړیوالو سره مسايل د تفاهم او مذاکرې له لارې حل کوي او له هغوی سره متقابل تعامل ته قوي اراده او پوره چمتووالی لري.

بي بي سي ويلي چې د افغانستان سرپرست حکومت په دغه هېواد کې د بي بي سي پښتو ټلوېزیون پر خپرونو بندیز لګولی دی.

د چين د بهرنيو چارو وزير پر دې سربېره چې د مس عينک کان د استخراج کار د ژر پيلېدو خبر ورکوي، وايي، چين چمتو دی چې له افغانستان سره سوداګريزې اړيکې لا پراخې کړي.

. . .

د زابل په جلدک سیمه کې څاه ته د لوېدلې پنځه کلن ماشوم د ژغورنې عملياتو د بهير د څارلو لپاره د دفاع سرپرست وزير او نور لوړپوړي حکومتي چارواکي د پېښې ته تللي دي.