نورالله ځاځی

د ریاست‌الوزراء سیاسي مرستیال د کورش نړۍوال فدراسیون له رییس سره په لیدنه کې ویلي، نړۍوالې ورزشي ادارې دې له افغان لوبغاړو او اړوندو ادارو سره خپلې همکارۍ ډېرې کړي او د تجربو شریکولو ته لومړیتوب ورکړي.

د ترکمنستان د برېښنا وزیر د راتلونکي ۲۰۲۵ زېږدیز کال لپاره د برېښنا پېرلو تړون غځولو او لاسلیک په موخه د افغانستان برېښنا شرکت عمومي اجرائیوي رییس ته عشق‌اباد ته د سفر بلنه ورکړې ده.

په افغانستان کې د ملګرو ملتونو مرستندویه ماموریت (یوناما) وايي چې د افغانستان لپاره د یوناما د ځانګړې استازې نوې مرستیاله جورجیت ګانیون د خپلې دندې پیل په موخه کابل ته راغله.

د امر بالمعروف، نهې عن‌المنکر او شکایتونو اورېدلو وزارت سرپرست وایي چې د اسلامي شریعت پلي کول د اسلامي نظام دنده او د افغاني ټولنې غوښتنه ده او دې برخه کې به له هیڅ ډول هڅو دریغ ونه کړي.

د کلیو د بیارغونې او پراختیا وزارت په پکتیکا کې د څه باندې ۴۰۰ زره امریکايي ډالرو په لګښت د اوبو رسولو اووه شبکو او پروان کې د څه باندې ۱۳ میلیون افغانیو په لګښت د اوبو یوه سربند د جوړېدو خبر ورکړ.

د المپیک ملي کمېټې رییس د کورش نړۍوال فدراسیون له یوه پلاوي سره په لیدنه کې له نړۍوالو ورزشي بنسټونو او ادارو غوښتي چې د تېر په څېر دې د افغانستان ورزش ته پاملرنه او له افغان ورزشکارانو دې ملاتړ وکړي.

خوست او پروان کې د اووه میلیون او ۷۲۰ زره افغانیو په لګښت د اوبو رسولو دوو شبکو چارې بشپړې او پکتیکا کې د څه باندې پنځه میلیون او ۶۵۷ زره افغانیو په لګښت د درېیو چک‌ډيمونو جوړولو کار پیل شو.

د اوبو او انرژۍ وزارت وايي چې د زابل په مرکز کلات کې د توري بند جوړولو پروژې چارې د ۱۲۷ میلیون افغانیو په لګښت بشپړې شوې.

د ریاست‌الوزراء اقتصادي معاونیت وايي چې د روان زېږدیز کال په اوږدو کې لسګونو کورنیو او بهرنیو کمپنیو په بېلابېلو سکټورونو کې شاوخوا پنځه میلیارده او ۳۴۸ میلیون ډالرو پانګونې ته لېوالتیا ښودلې ده.

د کابل ښار په ۱۷مه ناحیه کې د ۱۸.۵ میلیون افغانیو په لګښت د سړک او کوڅو جوړولو د درېیو پروژو چارې بشپړې شوې.

د افغانستان د اوبو او برېښنا وزارت وايي چې په کاپيسا کې د څه باندې ۱۵۱ زره امریکايي ډالرو په لګښت د څلورو رغنیزو پروژو کار پیل شو.

د افغانستان د صنعت او سوداګرۍ وزارت وایي چې له نهو ملي او نړۍوالو موسسو سره یې د نږدې اووه میلیون امریکایي ډالرو په ارزښت د همکاریو هوکړه‌لیکونه لاسلیک کړي دي.