لوګر کې د یوه ښوونځي او دیني مدرسې ځمکه له غصبه راوګرځول شوه

پل‌علم (پژواک، ۵ مرغومی ۱۴۰۳): د لوګر پوهنې ریاست وايي چې د دغه ولایت بره‌کي‌برک ولسوالۍ په شاه مزار سیمه کې د یوه ښوونځي او دیني مدرسې غصب شوې ۴۰ جریبه ځمکه بېرته را وګرځول شوه.

د دغه ولایت د پوهنې ریاست ویاند شاه پور عرب پژواک خبري اژانس ته وویل: «دا ځمکه د پوهنې وزارت، پوهنې ریاست، ولسوالۍ مقام، پوهنې آمریت، د لېسې ادارې په ګډو هلو ځلو د سیمې اوسېدونکو په بشپړې همکارۍ د غصب کوونکو له منګولو خلاصه شوې ده.»

نوموړي زیاته کړه، له غصبه خلاصه شوې ځمکه کې ۲۰ جریبه ځمکه د حضرت عبدالله ابن مسعود (رض) دیني مدرسې او ۲۰ جریبه ځمکه د شاه مزار لېسې پورې اړوند ده چې د سیمې خلکو له لوري غصب او د استوګنې کورونو جوړولو هڅې پيل شوې وې.

عرب زیاته کړه، پوهنې ریاست هڅه کوي په کومو ولسوالیو کې چې ښوونځیو او دیني مدرسو ته ځمکې ځانګړې شوې له غصبه وژغوري او ژر تر ژره ورباندې د ښوونځيو او تعلیمي مرکزونو ودانۍ جوړې کړي.

د یادونې ده چې د دولتي ځمکو د غصب مخنیوي کمېسیون له لوري هم د دغه ولایت په مرکز پل‌علم او یو شمېر ولسوالیو کې زرګونه جریبه دولتي ځمکه له غصبه خلاصه شوې ده.