اقتصادي معاونیت: افغانستان کې د څه باندې پنځه میلیارد ډالرو پانګونې لېوالتیا ښودل شوې

کابل (پژواک، ۵ تله ۱۴۰۳): د ریاست‌الوزراء اقتصادي معاونیت وايي چې د روان زېږدیز کال په اوږدو کې لسګونو کورنیو او بهرنیو کمپنیو په بېلابېلو سکټورونو کې شاوخوا پنځه میلیارده او ۳۴۸ میلیون ډالرو پانګونې ته لېوالتیا ښودلې ده.

د ریاست‌الوزراء اقتصادي معاونیت له لوري نن په خپره شوې خبرپاڼه کې راغلي چې اسلامي امارت په هېواد کې له کورنۍ او بهرنۍ پانګونې بشپړ ملاتړ کوي.

خبرپاڼه کاږي، د روان ۲۰۲۴ زېږدیز کال په اوږدو کې لسګونو کورنیو او بهرنیو کمپنیو په بېلابېلو سکټورونو کې شاوخوا پنځه میلیارده او ۳۴۸ میلیون ډالرو پانګونې ته لېوالتیا ښودلې ده.

خبرپاڼې د پانګونې سکټورونه زېربنا، برېښنا، مخابرات، ترانسپورټ، کرنه، صنعت، کانونه، روغتیا، کوچني – متوسط تشبثات، ښاري پراختیا او برېښنایي حکومتولي ښودلي دي.

د خبرپاڼې په حواله، یادې کمپنۍ په ګاونډو، د سیمې، عربي او لوېدیځ هېوادونو کې په بېلابېلو برخو کې د پانګونې مخینه لري.

د خبرپاڼې د معلوماتو له مخې، په راتلونکي کې به د زېربنا، د برېښنا د تولید، سوداګریزو مرکزونو، ترانسپورټ، برېښنایي حکومتولۍ او نورو برخو کې له کورنیو او بهرنیو کمپنیو سره د پانګونې قراردادونه لاسلیک او عملي چارې به یې پیل شي.