نورالله ځاځی

د راپورونو له مخې، له موريتانيا څخه اسپانیا ته تلونکې يوه کښتۍ د مراکش له ساحل سره نږدې ډوبه شوې چې ۴۴ کسان په‌کې مړه شوي او ګومان کېږي پاکستانیان دي.

د افغانستان د صنعت او سوداګرۍ وزارت وايي چې د اسلامي امارت یو پلاوی د دغه وزارت د ترانزیټ د رییس محمدالله بختیار په مشرۍ ایران ته ولاړ.

د روغتیا نړۍوال سازمان له غزې تر افغانستانه د ۴۲ بحراني سیمو څه باندې ۳۰۰ میلیون اوسېدونکو ته د مرستو رسولو لپاره د ۱.۵ میلیارد امریکايي ډالرو غوښتنه کړې ده.

مالیزیا کې د افغانستان سفارت سرپرست د دغه هېواد د فدرالي ایالتونو له مفتي سره په لیدنه کې د دواړو هېوادونو د سیاسي لیدلورو او د محاکمو اړوند د یو شمېر موضوعاتو په اړه خبرې کړې دي.

د افغانستان د سترې محکمې د اداري مرستیال په مشرۍ یو جګپوړی قضایي پلاوی په ایران کې د افغان زندانیانو د حقونو د تامین او په دغه هېواد کې پر اعدام د محکومو افغانانو په تړاو د خبرو لپاره نن سهار تهران ته ولاړ.

د عامې روغتیا وزارت سرپرست په کابل کې د ایران له سفیر سره په لیدنه کې ویلي، د افغانستان روغتیايي سیسټم د پیاوړتیا لپاره کیفیت لرونکو درملو او عصري طبي تجهیزاتو ته اړتیا ده.

د ملګرو ملتونو د بشري مرستو همغږي‌کوونکی دفتر (اوچا) وایي چې ایټالیا د افغانستان د بشري مرستو له صندوق سره د ۴،۵ میلیون یورو مرسته اعلان کړه.

د ریاست‌الوزراء اقتصادي معاونیت وايي، د اسلامي امارت د مشرتابه له لوري د صنعتي ساحو قانون په یوه مقدمه، شپږو بابونو، ۱۱ فصلونو او ۶۷ مادو کې توشېح شوی دی.

د افغانستان د عدلیې وزارت وايي، د مشرتابه د حکم له مخې، د اسلامي امارت هيڅ مسوول کس نه شي کولای چې په یوه وخت کې دوه ځايه په رسمي ډول دندې ترسره کړي.

افغانستان، سعودي عربستان او ترکیې د حماس او اسرائیل ترمنځ د اوربند د هوکړې هرکلی کړی او د ا.ا د بهرنیو چارو وزارت ویلي، اوس اړینه ده چې د هوکړې ټول پړاوونه په داسې بڼه بشپړ عملي شي چې اوربند دوامداره او بشري مرستې په بېړنۍ توګه د غزې ولس ته ورسېږي.

د افغانستان د مالیې وزارت وايي، د نیمروز ولایت په ګمرک کې د څه باندې ۳۲ میلیون افغانیو په لګښت د موټرو لپاره تمځای جوړ شو.

د بهرنیو چارو سرپرست وزیر وایي، د دې لپاره چې د نړۍوالو مرستو اعظمي استفاده وشي په کار ده چې د مرستو وېش د افغانستان د خلکو له اړتیاوو او لومړیتوبونو سره عیار شي او دې برخه کې همغږي نوره هم پیاوړې شي.